سنگاکارا ایک سو پچاسی رن بنا کر آؤٹ ہوئے

جب کھیل ختم ہوا تو شعیب ملک اکتیس اور فیصل اقبال سات رن بنا کر کریز پر موجود تھے۔ پاکستان کے آؤٹ ہونے والے آخری کھلاڑی یونس خان تھے جو مرلی دھرن کا دوسرا شکار بنے۔

تفصیلی سکور کارڈ کے لیے کلک کریں

تیسرے دن کے کھیل کی تصویری جھلکیاں

آخری دن پاکستان کو جیتنے کے لئے کم از کم 98 اوورز میں مزید369 رنز درکار ہوں گے۔ ٹیسٹ کرکٹ میں کسی بھی ٹیم کا چوتھی اننگز میں سب سے بڑا ہدف عبور کرتے ہوئے میچ جیتنے کا ریکارڈ 418 رنز کا ہے جب ویسٹ انڈیز نے2002کی سیریز میں انٹیگا ٹیسٹ میں آسٹریلیا کو تین وکٹوں سے شکست دی تھی۔

پاکستان کو چوتھی اننگز میں جیت کے لئے یہ سب سے بڑا ہدف ملا ہے۔ اس سے قبل 90-1989ء کے میلبرن ٹیسٹ میں آسٹریلیا نے اسے429 رنز کا ہدف دیا تھا لیکن پاکستانی ٹیم336 رنز پر آؤٹ ہوگئی تھی۔

پاکستان کی جانب سے عمران فرحت اور شعیب ملک نے دوسری اننگز کا آغاز کیا اور دونوں بلے بازوں نے اعتماد سے کھیلتے ہوئے سکور کو انسٹھ رن تک پہنچا دیا۔ اس موقع پر عمران فرحت 34 رن بنا کر مرلی دھرن کی گیند پر آؤٹ ہوگئے۔

اس سے قبل سنگاکارا کی عمدہ بلے بازی کی بدولت سری لنکا نے اپنی دوسری اننگز چار سو اڑتالیس رن پانچ کھلاڑی آؤٹ پر ختم کرنے کا اعلان کیا اور یوں اسے مجموعی طور پر چار سو ستاون رن کی برتری حاصل ہو گئی۔

سری لنکا کے آؤٹ ہونے والے کھلاڑیوں میں کمارا سنگاکارا شاندار 185 رن بنا کر آؤٹ ہوئے جبکہ سمارا ویرا کو 64 کے انفرادی سکور پر آفریدی نے بولڈ کیا۔ ان دونوں بلے بازوں کے درمیان ایک سو چوالیس رن شراکت ہوئی۔ اس سے قبل سری لنکا کے کپتان مہیلا جے وردھنے بیاسی رن بنا کر آؤٹ ہوئے۔ انہیں محمد آصف کی گیند پر عبدالرزاق نے کیچ کیا۔ جے وردھنے اور سنگاکارا کے درمیان ایک سو اٹھاون رن کی شراکت ہوئی تھی۔

پاکستان کی جانب سے محمد آصف نے دو جبکہ شعیب ملک، شاہد آفریدی اور دانش کنیریا نے ایک، ایک وکٹ حاصل کی۔

یاد رہے کہ ٹیسٹ کے تیسرے دن پاکستان کے تمام کھلاڑی 176 کے مجموعی سکور پر آؤٹ ہوگئے تھے اور کھیل کے اختتام پر سری لنکا نے دو وکٹ کے نقصان پر 242 رن بنائے تھے۔سنہالیز اسپورٹس کلب گراؤنڈ میں کھیلے جا رہے میچ کا پہلا دن بارش کی نذر ہو گیا تھا۔

پاکستانی ٹیم انضمام الحق( کپتان) ۔ یونس خان۔ فیصل اقبال۔ عبدالرزاق۔ شاہد آفریدی۔ شعیب ملک۔ کامران اکمل۔عمران فرحت۔ عمرگل۔ دانش کنیریا اور محمد آصف پر مشتمل ہے۔

سری لنکا کی ٹیم میں جے وردھنے( کپتان) اپل تھارنگا۔ سنتھ جے سوریا۔کمار سنگاکارا۔ تلکارتنے دلشن۔تھلان سماراویرا۔ فرویز ماہروف۔ لستھ مالنگا۔ مرلی دھرن۔ مالنگا بندارا اور دلہارا فرنینڈو شامل ہیں۔

امپائرز جنوبی افریقہ کے روڈی کرٹزن اور آسٹریلیا کے اسٹیو ڈیوس ہیں میچ ریفری آسٹریلیا کے ایلن ہرسٹ ہیں۔