عبدالرشید شکور بی بی سی اردو ڈاٹ کام کولمبو

	عمران فرحت کی عمدہ فارم کا سلسلہ برقرار ہے

جب خراب روشنی کی وجہ سے کھیل ختم ہوا تو اس وقت انضمام الحق تیس رن پر بیٹنگ کر رہے تھے عبدالرزاق نے ایک رن بنایا تھا۔

تفصیلی سکور کارڈ کے لیئے کلک کریں

اپنی اننگز کے دوران انضمام الحق پاکستان اور سری لنکا کے درمیان ہونے والے ٹیسٹ میچوں میں سب سے زیادہ رنز بنانے والے بیٹسمین بھی بن گئے۔ انہوں نے سری لنکا کے خلاف19 ٹیسٹ میچوں میں1495 رنز بنائے ہیں۔ اس سے قبل یہ اعزاز اروندا ڈی سلوا کے پاس تھا جنہوں نے پاکستان کےخلاف 21 ٹیسٹ میچوں میں1475 رنز بنائے تھے۔

پاکستان کے آؤٹ ہونے والے آخری کھلاڑی عمران فرحت انہتر رن بنا کر آؤٹ ہوئے۔ انضمام اور عمران نے چوتھی وکٹ کی شراکت میں چورانوے رن کا اضافہ کیا۔

آؤٹ ہونے والے دیگر کھلاڑیوں میں فیصل اقبال دو رن، شعیب ملک تیرہ رن بنا کر جبکہ یونس خان پہلی ہی گیند پر کوئی رن بنائے بغیر آؤٹ ہوئے۔ سری لنکا کی جانب سے مہروف اور ملنگا نے دو، دو وکٹیں حاصل کی ہیں۔

اس سے قبل سری لنکا کی ٹیم چائے کے وقفے سے پہلے اپنی پہلی اننگز میں ایک سو پچاسی رن بنا کر آؤٹ ہو گئی تھی۔ دلشان تلکارتنے اور فرویز مہروف کے علاوہ سری لنکا کا کوئی بھی بلے باز پاکستانی بالنگ کے سامنے نہیں ٹھہر سکا۔ پاکستان کی طرف سے محمد آصف نے چار ، دانش کنیریا نے تین ، عمرگل نے دو جبکہ شاہد آفریدی نے ایک وکٹ حاصل کی۔

پہلے دن کا کھیل، کیمرے کی آنکھ سے

سری لنکا کی پہلی پانچ وکٹیں صرف بتیس کے سکور پر گر گئی تھیں تاہم تلکارتنے دلشان اور فرویز مہروف نے چھٹی وکٹ کے لیئے ایک سو دس رن بنا کر اپنی ٹیم کو مشکل صورتحال سے نکالا۔

	محمد آصف نےمیچ کے پہلے ہی اوور میں وکٹ حاصل کی

سنہالیز اسپورٹس کلب گراؤنڈ میں کھیلے جا رہے میچ کا پہلا دن بارش کی نذر ہو گیا تھا۔ دوسرے دن کے آغاز میں پاکستانی کپتان انضمام الحق نے ٹاس جیت کر سری لنکا کو بیٹنگ کی دعوت دی تھی۔

پاکستان کو پہلی کامیابی اس وقت ملی جب پہلے ہی اوور میں تھارنگا بنا کوئی رن بنائے محمد آصف کی گیند پر ایل بی ڈبلیو ہوگئے۔ جب سری لکا کا سکور دس رن پر پہنچا تو صحت یاب ہو کر ٹیم میں واپس آنے والے سنتھ جے سوریا کو عمر گل نے بولڈ کر دیا۔

	سنگاکارا صرف 8 رن بنا سکے

اٹھارہ کے مجموعی سکور پر سنگاکارا آٹھ رن بنا کر محمد آصف کا دوسرا شکار بنے جبکہ کپتان مہیلا جے وردھنے بھی اپنی ٹیم کا سہارا نہ دے سکے اور صرف ایک رن بنا کر عمر گل کی گیند پر کامران اکمل کے ہاتھوں کیچ ہو گئے۔سمارا ویرا بھی چار رن بنا کر محمد آصف کی گیند پر بولڈ ہوئے۔

پاکستانی ٹیم میں فیصل اقبال کو ہمسٹرنگ کا شکار محمد یوسف کی جگہ ٹیم میں شامل کیاگیا ہے۔

پاکستانی ٹیم انضمام الحق( کپتان) ۔ یونس خان۔ فیصل اقبال۔ عبدالرزاق۔ شاہد آفریدی۔ شعیب ملک۔ کامران اکمل۔عمران فرحت۔ عمرگل۔ دانش کنیریا اور محمد آصف پر مشتمل ہے۔

سری لنکن ٹیم میں جے وردھنے( کپتان) اپل تھارنگا۔ سنتھ جے سوریا۔کمار سنگاکارا۔ تلکارتنے دلشن۔تھلان سماراویرا۔ فرویز ماہروف۔ لستھ مالنگا۔ مرلی دھرن۔ مالنگا بندارا اور دلہارا فرنینڈو شامل ہیں۔

امپائرز جنوبی افریقہ کے روڈی کرٹزن اور آسٹریلیا کے اسٹیو ڈیوس ہیں میچ ریفری آسٹریلیا کے ایلن ہرسٹ ہیں۔