عبدالرشید شکور بی بی سی اردو ڈاٹ کام، کولمبو

	شعیب ملک 37 گیندوں پر 46 رن بنا کر آؤٹ ہوئے

سیریز کا پہلا میچ بارش کے سبب مکمل نہ ہوسکا تھا جبکہ دوسرا میچ پاکستان نے چار وکٹوں سے جیتا تھا۔

تازہ ترین سکور کے لیےکلک کریں

پاکستان نے سری لنکا کے خلاف بارہ سال کے طویل عرصے کے بعد ون ڈے سیریز جیتی ہے۔ آخری بار 95-1994ء میں پاکستان نے سلیم ملک کی قیادت میں سری لنکا میں کھیلی گئی پانچ میچوں کی سیریز چار ایک سے جیتی تھی۔

سنہالیز اسپورٹس کلب گراؤنڈ میں کھیلے گئے تیسرے میچ میں پاکستانی کپتان انضمام الحق نے ٹاس جیت کر سری لنکا کو بیٹنگ کی دعوت دی اور سری لنکا کی پوری ٹیم اننگز کے آخری اوور میں 224 رن بنا کر آؤٹ ہوگئی۔

تیسرا ون ڈے: کیمرے کی آنکھ سے

	عمران فرحت نے 46 رن کی عمدہ اننگز کھیلی

جواب میں پاکستان نے محمد یوسف، شعیب ملک اور عمران فرحت کی عمدہ بلے بازی کی بدولت مطلوبہ ہدف چھیالیسویں اوور میں حاصل کر لیا۔ محمد یوسف نے نصف سنچری بنائی۔ وہ 53 رن بنا کر آؤٹ ہوئے۔ شعیب ملک اور عمران فرحت نے چھیالیس رن کی خوبصورت اننگز کھیلی۔

سری لنکا کی جانب سے مرلی دھرن نے تین، معروف نے دو جبکہ دلشان نے ایک وکٹ حاصل کی۔
اس سے قبل پاکستانی بالروں کی عمدہ بالنگ کی وجہ سے سری لنکن بلے باز ایک بڑا سکور کرنے میں ناکام رہے۔ کاپوگدیرا، جے وردھنے اور تلکا رتنے دلشان کے علاوہ کوئی بلے باز اعتماد سے پاکستانی بالروں کو نہیں کھیل سکا۔کاپوگدیرا پچاس، تلکارتنے چوالیس جبکہ جے وردھنے اکتیس رن بنا کر نمایاں رہے۔

پاکستان کی جانب سے شاہد آفریدی اور محمد آصف نے تین، تین جبکہ عبدالرزاق اور شعیب ملک نے ایک، ایک وکٹ حاصل کی جبکہ دو سری لنکن کھلاڑی رن آؤٹ ہوئے۔

	عبدالرزاق نے پاکستان کو پہلی کامیابی دلوائی

دونوں ٹیموں میں ایک ایک تبدیلی کی گئی۔ سلمان بٹ کی جگہ عمران فرحت کو پاکستانی ٹیم میں شامل کیا گیا جبکہ نوآن کولاسکیرا کی جگہ پرساد سری لنکن ٹیم میں آئے۔

پاکستانی ٹیم انضمام الحق( کپتان) محمد یوسف۔ یونس خان۔ عبدالرزاق۔ شاہد آفریدی۔ شعیب ملک۔ کامران اکمل۔عمران فرحت۔ نوید الحسن۔ راؤ افتخار اور محمد آصف پر مشتمل ہے۔

سری لنکن ٹیم میں جے وردھنے( کپتان) اپل تھارنگا۔ سنگاکارا۔ تلکارتنے دلشن۔ رسل آرنلڈ۔ پرویز ماہروف۔ مالنگا۔ مرلی دھرن۔ لوکوآراچی۔ چمارا کاپوگدیرا اور پرساد شامل ہیں۔

امپائرز سری لنکا کے اشوکا ڈی سلوا اور آسٹریلیا کے اسٹیو ڈیوس ہیں میچ ریفری آسٹریلیا کے ایلن ہرسٹ ہیں۔