عبدالرشید شکور بی بی سی اردو ڈاٹ کام، کولمبو

	توقع ہے کہ پاکستان کے خلاف پہلا ٹیسٹ کھیلوں گا: جے سوریا

جے سوریا نے پاکستان اور سری لنکا کے درمیان تیسرے ون ڈے کے موقع پر بی بی سی کو بتایا کہ ان کی فٹنس پہلے سے بہتر ہے اور وہ توقع کررہے ہیں کہ پاکستان کے خلاف پہلا ٹیسٹ کھیل سکیں گے۔

جے سوریا اور چمندا واس فٹنس مسائل کا شکار ہوکر پاکستان کے خلاف ون ڈے سیریز سے باہر ہو گئے تھے۔ جے سوریا کی ران کا پٹھہ کھنچ گیا تھا جبکہ واس کی کمر میں تکلیف تھی۔ تاہم اب سری لنکن کرکٹ بورڈ کے ذرائع نے فاسٹ بولر چمندا واس کی واپسی کا بھی عندیہ دیا ہے۔

سری لنکن کرکٹ بورڈ کے ڈائریکٹر کرکٹ آپریشنز بنڈولا ورنا پورا نے بی بی سی کو بتایا کہ سنتھ جے سوریا کا پہلا ٹیسٹ کھیلنا مشکل نظرآتا ہے البتہ ممکن ہے کہ واس پہلا ٹیسٹ کھیلنے میں کامیاب ہوجائیں۔

سری لنکن کرکٹ ٹیم پاکستان کے خلاف ون ڈے سیریز میں جے سوریا اور واس کے علاوہ کپتان مرون اتاپتو اور فاسٹ بولر روچیرا پریرا کی خدمات سے بھی محروم رہی۔ اتاپتو کمر کی تکلیف کے سبب پہلے ون ڈے کے بعد سیریز سے باہر ہوگئے جبکہ پریرا پہلے ہی سے ان فٹ تھے۔

	واس پہلے ٹیسٹ میں شرکت کر سکتے ہیں

دوسری جانب آف اسپنر ارشدخان جمعہ کو کولمبو پہنچ کر پاکستانی ٹیسٹ سکواڈ میں شامل ہوجائیں گے۔ ون ڈے اسکواڈ میں شامل آف سپنر طاہر خان اور لیفٹ آرم سپنر عبدالرحمن جمعہ کو وطن واپس جا رہے ہیں۔

سلیکشن کمیٹی نے ڈومیسٹک کرکٹ کی پرفارمنس کی بنیاد پر ان دونوں بولرز کو اس دعوے کے ساتھ ٹیم میں شامل کیا تھا کہ سری لنکا کے دورے میں انہیں اپنی کارکردگی نکھارنے کا موقع ملےگا لیکن دورے میں کوئی سائیڈ میچ نہ ہونے اور تجربہ کار کھلاڑیوں پر انحصار کی پالیسی کے سبب دونوں بولرز کو دورے میں کھیلنے کا کوئی موقع نہ مل سکا۔

ارشد خان نو ٹیسٹ میچوں میں پاکستان کی نمائندگی کرچکے ہیں اور انہوں نے30 کی اوسط سے32 وکٹیں حاصل کی ہیں۔