عبدالرشید شکور بی بی سی اردو ڈاٹ کام، کراچی

	سورو گنگولی کا کیرئر خطرے میں نظر آتا ہے

گنگولی کے علاوہ پاکستان کے دورے پر موجود انیل کمبلے، وسیم جعفر، پارتھیو پٹیل اور وی وی ایس لکشمن بھی ٹیسٹ سیریز کے اختتام پر وطن واپس چلے جائیں گے۔ ان کی جگہ سری سانتھ، محمد کیف، سریش رینا اور مرلی کارتک ون ڈے ٹیم میں شامل کیے جائیں گے۔

تینتیس سالہ سورو گنگولی نے اپنا 279 واں اور آخری ون ڈے انٹرنیشنل گزشتہ سال ہرارے میں نیوزی لینڈ کے خلاف کھیلا تھا جس کے بعد نہ صرف ان کی کپتانی چھن گئی بلکہ وہ جنوبی افریقہ اور سری لنکا کے خلاف ون ڈے سیریز سے بھی باہر ہوگئے۔

پاکستان کے دورے میں وہ لاہور ٹیسٹ میں کھیلے تاہم فیصل آباد ٹیسٹ میں ان کی جگہ آر پی سنگھ کو ٹیسٹ کیپ دی گئی۔

کراچی ٹیسٹ میں ہربھجن سنگھ کی جگہ گنگولی کی ٹیم میں واپسی ہوئی ہے لیکن ایسا دکھائی دیتا ہے کہ ان کے کیرئر کے دن گنے جا چکے ہیں۔