مناء رانا بی بی سی اردوڈاٹ کام، فیصل آباد

	شعیب فیصل آباد ٹیسٹ میچ میں پاکستان کی دوسری اننگز میں نہیں کھیل سکیں گے

ان کی عمر پچاسی سال تھی۔ شعیب ملک کے دو بھائی اور تین بہنیں ہیں۔

شعیب ملک کو اپنے والد ملک فقیرحسین کی وفات کے سبب سیالکوٹ واپس جانا پڑا اب وہ فیصل آباد ٹیسٹ میچ میں پاکستان کی دوسری اننگز میں نہیں کھیل سکیں گے۔

شعیب ملک کے والد ہیپاٹائٹس سی کے عارضے میں مبتلا تھے اور چار روز پہلے شدید علالت کے سبب انہیں ہسپتال لے جانا پڑا وہ بیماری کے سبب کومے میں چلے گئے تھے۔

شعیب ملک فیصل آباد ٹیسٹ میچ کے دوسرے دن اپنے والد کی بیماری کی خبر سن کر سیالکوٹ چلے گئے تھے لیکن ٹیم مینجمنٹ نے میچ کی صورتحال کے سبب انہیں واپس آنے کی درخواست کی توشعیب منگل کی شام سیالکوٹ سے روانہ ہو گئے لیکن بدھ کی صبح چار بجے ان کے والد کا انتقال ہو گیا اور انہیں فوری طور پر واپس سیالکوٹ روانہ ہونا پڑا۔

جب شعیب ملک اپنے والد کی بیماری کے سبب سیالکوٹ گئے تھے تو پاکستان کی ٹیم کے کوچ باب وولمر نے کہا کہ شعیب ملک کو سیالکوٹ سے بلانا درست نہیں لگتا لیکن پھر بھی انہیں ٹیم کے لیے کھیلنے کے لیے واپس بلایا گیا۔

چند حلقوں کا خیال ہے کہ ایسی صورتحال میں کہ جب شعیب کے والد کی حالت بہت خراب تھی شعیب کو واپس بلانا اچھا عمل نہیں تھا۔