مناء رانا بی بی سی اردو ڈاٹ کام لاہور

آئی سی سی ٹرافی دو ہزار چار

پاکستان کرکٹ بورڈ کے ڈائریکٹر کرکٹ آپریشن سلیم الطاف نے دبئی میں ہونے والے انٹرنیشنل کرکٹ کونسل کے اجلاس سے واپس آنے کے بعد لاہور میں صحافیوں سے بات چیت میں بتایا کہ ہر دو سال بعد ہونے والا آئی سی سی چمپئنز ٹرافی ٹورنامنٹ اب ہر سال ہوا کرے گا۔

سلیم الطاف کے مطابق آئی سی سی نے دو ہزار دس کا آئی سی سی چمپئنز ٹرافی کرکٹ ٹورنامنٹ کرانے کے لیے پاکستان کو چنا ہے۔

سلیم الطاف نے بتایا کہ آئی سی سی کے فیصلے کے مطابق اگلی ایفرو ایشین کرکٹ سیریز بھارت کے شہر بنگلور میں کھیلی جائے گی۔

پی سی بی کے ڈائریکٹر کرکٹ آپریشن کا کہنا تھا کہ اگلے سال پاکستان میں ہونے والی پاک بھارت کرکٹ سیریز کے شیڈول اور مقامات اس سال اکتوبر تک طے کر لیے جائیں گے۔
سلیم الطاف کے مطابق نیشنل کرکٹ اکیڈمی کی چھ اہم اسامیوں کے لیے اشتہار دیا جا رہا ہے۔ ان چھ اسامیوں میں ایک ڈائریکٹر، ایک اسسٹننٹ ڈائریکٹر، دو ایلیٹ کوچز اور دو جونئر کوچز شامل ہیں۔

انہوں نے کہا کہ بارہ ستمبر کو ایڈہاک کمیٹی کے اجلاس میں ایک کمیٹی تشکیل دی جائے گی جو ان اسامیوں کے لیے امیدواروں کے انٹرویو کر کے ان کا انتخاب کرے گی۔

انضمام الحق کو ورلڈ الیون میں شامل نہ کرنے پر سلیم الطاف نے کہا کہ انہیں اس بات کا افسوس ہے تاہم آئی سی سی اس ضمن میں کچھ نہیں کر سکتی کیونکہ یہ انتخاب آزاد سلیکٹر کے پینل نے کیا ہے۔

سلیم الطاف کے مطابق سچن ٹنڈولکر کے ان فٹ ہونے کے بعد اب اس کا قوی امکان ہے کہ انضمام الحق ورلڈ الیون میں جگہ حاصل کر لیں۔