باب وولمر نے الزام لگایا تھا کہ آسٹریلوی کھلاڑیوں سے ایمپائر متاثر ہیں

آئی سی سی کے چیف ایگزیکیوٹیو میلکم مارشل نے باب وولمر کے خلاف آئی سی سی کوڈ کے لیول 2.4 کی خلاف ورزی کرنے پر ان کی شکایت کی۔ یہ لیول میچ سے منسلک کسی اہلکار یا واقعہ سے متعلق ’عوامی سطح پر تنقید یا نامناسب بیان‘ کے بارے میں ہے۔

کیونکہ یہ معاملہ سیریز کے بعد کا ہے اس لیے اس کے متعلق سماعت پاکستان کرکٹ بورڈ کرے گا۔

آئی سی سی کے ضابطۂ اخلاق کی خلاف ورزی کے متعلق میچ ایمپائر، ٹیم مینیجر، مقابلے میں حصہ لینے والی ٹیموں کے چیف ایگزیکیوٹیو یا آئی سی سی کے چیف ایگزیکیوٹیو شکایت کر سکتے ہیں۔

لیول 2 کی تمام خلاف ورزیوں کی کم از کم سزا کھلاڑی یا اہلکار کی میچ فیس میں سے 50 فیصد کٹوتی اور زیادہ سے زیادہ پوری میچ فیس یا/اور ایک ٹیسٹ یا ایک ون ڈے پر پابندی ہے۔

پاکستان کے کوچ باب وولمر نے الزام لگایا تھا کہ ایمپائروں نے آسٹریلوی ٹیم کی اپیلوں کو زیادہ سنا ہے۔

باب وولمر نے کہا تھا کہ آسٹریلیا کے کھلاڑیوں کی اپیلوں کا مقصد ایمپائروں پر زیادہ دباؤ ڈالنا تھا۔

تاہم ایمپائر بلی باؤڈن نے اس کی تردید کی تھی اور کہا تھا کہ ’باب کو رائے رکھنے کا حق ہے، لیکن جہاں تک میرا تعلق ہے میں نے ایک اچھی ٹیسٹ اور ون ڈے سیریز میں شرکت کی ہے‘۔

آسٹریلیا نے پاکستان کو تینوں کے تینوں ٹیسٹ میچوں میں شکست دی ہے اور ویسٹ انڈیز اور پاکستان کے ساتھ سہہ فریقی ٹورنامنٹ بھی جیت لیا ہے۔

باؤڈن نے اس بات پر اصرار کیا کہ ہوم کراؤڈ اور زیادہ اپیلیں ایمپائر کے فیصلے پر اثر انداز نہیں ہوتیں۔

انہوں نے کہا کہ ’مجھے اس سے کوئی سروکار نہیں کہ ایک کھلاڑی اپیل کرتا ہے کہ گیارہ کھلاڑی، مجھے اس کی کوئی پریشانی نہیں، اور نہ ہی تماشائیوں کی کیونکہ ان کے جوش میں آنے سے پہلے ہی میں اپنا فیصلہ لے چکا ہوتا ہوں‘۔