مناء رانا بی بی سی اردو ڈاٹ کام لاہور

وزیراعظم نے کراچی کے ہاکی سٹیڈیم کو بہتر کرنے اور فلڈ لائٹس لگانے کے لیے فیڈریشن کی ہر ممکن مدد کا بھی وعدہ کیا

پانچ پانچ لاکھ روپے کے اس انعام کا اعلان پاکستان کے وزیراعظم شوکت عزیز نے اتوار کو قومی ہاکی ٹیم کے کھلاڑیوں سے ملاقات کے بعد کیا۔

پاکستان ہاکی فیڈریشن کے صدر طارق کرمانی اور سکریٹری بریگیڈئر ریٹائرڈ مسرت اللہ خان بھی اس موقع پر موجود تھے۔

بریگیڈئر ریٹائرڈ مسرت اللہ خان کا کہنا تھا کہ یہ کھلاڑیوں کے لیے بہت اعزاز کی بات ہے کہ وزیراعظم پاکستان نے اپنی مصروفیات میں سے ہاکی کے کھلاڑیوں کی حوصلہ افزائی کے لیے وقت نکالا۔

انہوں نے کہا کہ وزیراعظم نے اس فتح پر ٹیم کو مبارکباد دی اور اگلےٹورنامنٹس میں اچھی کارکردگی کے لیے کہا۔

انہوں نے کہا کہ کھلاڑیوں کے لیے پانچ پانچ لاکھ کا انعام ان کے لیے ایک بہت بڑی حوصلہ افزائی ہے۔

بریگیڈئر مسرت اللہ کے مطابق وزیراعظم نے کراچی کے ہاکی سٹیڈیم کو بہتر کرنے اور فلڈ لائٹس لگانے کے لیے فیڈریشن کی ہر ممکن مدد کا بھی وعدہ کیا۔

پاکستان ہاکی ٹیم کے کپتان محمد ثقلین کا کہنا تھا کہ پوری ٹیم اس انعام کے اعلان پر بے پناہ خوش ہے اس سے کھلاڑیوں کا مورال بہت بلند ہوا۔

محمد ثقلین نے کہا کہ اس انعام کے بعد کھلاڑی مزید محنت کریں گے، اس سے جیتنے کی لگن میں اضافہ ہوا ہے انہیں اندازہ ہوا ہے کہ جیت کی صورت میں کرکٹ کے کھلاڑیوں کی طرح ان کی بھی عزت افزائی ہو گی۔