عبدالرشید شکور بی بی سی اردو ڈاٹ کام، کراچی

عالمی نمبر ایک فرانس کے تھیری لنکو نے بھی شرکت کی تصدیق کردی ہے۔

سابق عالمی چیمپئنز انگلینڈ کے پیٹرنکل اور جوناتھن پاور کے سوا تمام ہی ٹاپ رینکنگ کھلاڑی پاکستان اوپن میں شرکت کریں گے۔ تین سال قبل پاکستان اوپن کا فائنل کھیلنے والے پیٹرنکل اور پاور پاکستان نہیں آرہے ہیں۔

عالمی نمبر ایک فرانس کے تھیری لنکو نے بھی پاکستان اوپن میں شرکت کی تصدیق کردی ہے ابتدائی فہرست میں ان کا نام شامل نہیں تھا لیکن بعد میں انہوں نے پاکستان اوپن میں حصہ لینے کا فیصلہ کرلیا وہ پہلے راؤنڈ میں انگلینڈ کے بریڈلی بال کے مدمقابل ہونگے۔

انگلینڈ کے جیمز ولسٹروپ پاکستان اوپن کے دفاعی چیمپئن ہیں وہ اپنے اعزاز کے دفاع کی پیش قدمی پاکستان کے عامر اطلس خان کے خلاف میچ سے کرینگے۔

عامراطلس کو جو ایشین جونیئر چیمپئن ہیں وائلڈ کارڈ انٹری دی گئی ہے۔

جیمز ولسٹروپ سے فائنل ہارنے والے آسٹریلیا کے انتھونی رکٹس پہلے راؤنڈ میں کوالیفائر کھلاڑی سے کھیلیں گے۔ کوالیفائنگ راؤنڈز سے آٹھ کھلاڑی فائنل راؤنڈز میں آئیں گے۔

پاکستان کے شاہد زمان پہلے راؤنڈ میں کوالیفائر کھلاڑی سے مقابلہ کرینگے جیت کی صورت میں ان کے دوسرے راؤنڈ میں متوقع حریف تھیری لنکو ہونگے۔

منصورزمان کا پہلا میچ فرانس کے گریگوری گالٹیئر سے ہوگا۔

پاکستان اوپن کے ڈراز میں سابق عالمی چیمپئن آسٹریلیا کے ڈیوڈ پامر کا نام بھی شامل ہے حالانکہ ان پر ورلڈ ڈبلز چیمپئن شپ کے دوران ریفری کے ساتھ نامناسب رویہ اختیار کرنے پر ایک سالہ پابندی عائد ہے۔

پاکستان اسکواش فیڈریشن کے سینئرنائب صدر ائرمارشل راشد کلیم کا کہنا ہے کہ اس ضمن میں اسکواش کی عالمی تنظیم پی ایس اے سے رابطہ کیا جارہا ہے تاکہ صحیح صورتحال کا علم ہوسکے۔