مناء رانا بی بی سی اردو ڈاٹ کام، لاہور

وقار کو پی سی بی کے چیئرمین نے ملاقات کے لیے قذافی سٹیڈیم بلایا ہے

پاکستان ٹیم کے سابق کپتان فاسٹ بالر وقار یونس آسٹریلیا میں پندرہ دن قیام کے بعد پاکستان واپس پہنچ گئے ہیں۔وقار کرکٹ کمنٹری کی مصروفیات کے سبب آسٹریلیا گئے ہوئے تھے۔

وقار یونس کو پی سی بی کے چیئرمین نے ملاقات کے لیے قذافی سٹیڈیم بلایا ہے۔
ذرائع کے مطابق وقار یونس کو پاکستانی بالرز کی تربیت کے لیے بالنگ کوچ مقرر کیا جا رہا ہے تاہم ابھی تک پی سی بی کی جانب سے اس کا باقاعدہ اعلان نہیں کیا گیا۔

پیر کے روز ہونے والی اس ملاقات کے بعد ایسے کسی اعلان کی توقع کی جا رہی ہے۔

وسیم اکرم اور وقار یونس کے ٹیم سے جانے کے بعد پاکستان ٹیم بالنگ کے شعبے میں مسائل کا شکار رہی ہے اور ابھی تک ان دونوں کھلاڑیوں کا کوئی متبادل سامنےدکھائی نہیں دیتا۔

فاسٹ بالر شعیب اختر بھی فٹنس مسائل سے دوچار رہے ہیں اور فٹ نہ ہونے کے سبب وہ بھارت کا اہم دورہ بھی نہیں کر رہے ہیں۔ان حالات میں پاکستانی بالنگ کے شعبے کے لیے ایک ماہر بالنگ کوچ کی ضرورت محسوس کی جا رہی ہے۔

پاکستان ٹیم کے غیرملکی کوچ باب وولمر کے خیال میں بالنگ کوچ کا تقرر ٹیم کے لیے فائدہ مند ہوگا کیونکہ سولہ کھلاڑیوں کی ٹیم میں ہر ایک کو انفرادی توجہ دینا کچھ مشکل ہوتا ہے لہذا بالنگ کوچ کا مثبت اثر پڑے گا۔