عبدالرشید شکور
بی بی سی اردو ڈاٹ کام، کراچی |  |
اسکواش کی جونیئر عالمی چیمپئن شپ سترہ سے اٹھائیس اگست تک اسلام آباد کے نوتعمیر شدہ مصحف علی میر اسکواش کمپلیکس میں ہو گی۔ پاکستان پہلی بار ورلڈ جونیئرچیمپئن شپ کی میزبانی کررہا ہے اور اسے کے ساتھ ساتھ وہ اپنے اعزاز کا دفاع بھی کرے گا۔ دسمبر2002 ء میں بھارت کے شہر چنئی میں پاکستان نے بیس سال کے طویل انتظار کے بعد انگلینڈ کو شکست دے کر عالمی جونیئر ٹیم ٹائٹل جیتا تھا۔ اس فاتح ٹیم کے کوچ رحمت خان تھے جن کی نگرانی میں پاکستانی نوجوان کھلاڑیوں نے برٹش اوپن جونیئر میں بھی شاندار نتائج دیئے اور سفیرخان نے انفرادی اعزاز جیتا لیکن اس عمدہ کارکردگی کے باوجود رحمت خان کی بحیثیت کوچ مستقبل تعیناتی ورلڈ جونیئر میں پاکستان کی کارکردگی سے مشروط کردی گئی ہے۔ پاکستان نے عالمی جونیئر مقابلے کے ٹیم مقابلوں کے لیے خالد اطلس، یاسر بٹ، فرحان محبوب اور باسط اشفاق پر مشتمل چار رکنی ٹیم منتخب کی ہے جبکہ انفرادی مقابلوں میں ان چار کے علاوہ مزید چار کھلاڑی عاقب حنیف،عامراطلس اور شاہنواز بھی حصہ لیں گے۔ خالد اطلس چنئی میں عالمی اعزاز جیتنے والی پاکستان ٹیم میں بھی شامل تھے۔ ایک سو اٹھائیس کھلاڑیوں کے ڈراز کو حتمی شکل دیتے ہوئے ورلڈ اسکواش فیڈریشن نے بھارت کے سورو گھوسل کو ٹاپ سیڈ رکھا ہے۔ سوروگھوسل نے اس سال جنوری میں برٹش اوپن جونیئر اسکواش چیمپئن شپ جیتی ہے لیکن پاکستان اسکواش فیڈریشن پاکستانی کھلاڑیوں کے مقابلے پر انہیں ٹاپ سیڈ قرار دیئے جانے پر خوش نہیں ہے۔ اس کا کہنا ہے کہ عالمی رینکنگ پاکستانی کھلاڑیوں کی بہتر ہے جبکہ حالیہ مقابلوں میں وہ گھوسل سے زیادہ اچھے نتائج دینے میں کامیاب رہے ہیں اس کے باوجود بھارتی کھلاڑی کو ٹاپ سیڈ رکھاجانا حیران کن ہے۔ ورلڈ جونیئر مقابلے انیس سو اسّی میں شروع ہوئے تھے پاکستان نے تین مرتبہ ٹیم ایونٹ جیتا ہے جبکہ انفرادی مقابلوں میں ابتک صرف دو کھلاڑی سہیل قیصر اور جان شیرخان فاتح رہے ہیں۔ جان شیرخان دنیا کے واحد کھلاڑی ہیں جنہوں نے اسکواش کے سینئر اور جونیئرعالمی اعزاز جیتے ہیں۔ | 
یہ صفحہ دوست کو ای میل کیجیئے
پرِنٹ کریں
