 |  واہگہ پر پرچم اتارنے کا مقابلہ ہر شام ہوتا ہے |
پاک بھارت ایک روزہ سیریز کے آخری دو میچوں کے لئے بھارتی شائقین کی بڑی تعداد امرتسر سے واہگہ کے راستے لاہور پہنچ رہی ہے۔ لاہور میں ہونے والا پہلا اور مجموعی طور پر ایک روزہ سیریز کا چوتھا میچ اتوار کو کھیلا جا رہا ہے۔ پاکستان نے ان شائقین کو ویزے کی سہولت فراہم کرنے کی غرض سے امرتسر میں ایک عارضی دفتر قائم کر رکھا ہے۔ جمعہ کے روز تقریباً تین ہزار افراد اس عارضی دفتر کے باہر قطار لگائے کھڑے رہے۔ ان میں سے کئی تو گزشتہ تین دن سے امرتسر میں دفتر کھلنے کا انتظار کر رہے تھے کیونکہ پہلے اس دفتر کے بدھ کے روز کھلنے کا اعلان کیا گیا تھا۔ مشرقی پنجاب کے دارالحکومت چندیگڑھ سے بی بی سی کے نامہ نگار آست جولی نے بتا ہے کہ گزشتہ روز جن افراد کو ویزے جاری کیے گئے وہ مسکراتے چہروں کے ساتھ یہ کہتے ہوئے اس عارضی دفتر سے باہر نکلے کہ ان کا دیرینہ خواب پورا ہوگیا ہے۔ ویزا کے خواہشمند افراد میں مرد، عورتیں اور بچے شامل تھے۔ ان افراد میں بیشتر ایسے تھے جو میچ دیکھنے کے ساتھ پاکستان دیکھنے کے بارے میں بھی پرجوش تھے۔ کئی کا کہنا تھا کہ میچ تو ایک بہانہ ہے۔ امرتسر کی انتظامیہ نے ان شائقین کو سرحد پار بھجوانے کے لئے خصوصی انتظامات کیے ہیں اور اس موقع پر مزید بسیں چلائی جا رہی ہیں۔ بھارت اور پاکستان کے مابین حالیہ ایک روز سیریز میں پانچ میچ شامل ہیں جن میں سے پہلے میچ میں بھارت نے کامیابی حاصل کی۔ یہ میچ کراچی میں کھیلا گیا تھا۔ اس کے بعد راولپنڈی اور پشاور کے میچ پاکستان نے جیتے ہیں۔ | 
یہ صفحہ دوست کو ای میل کیجیئے
پرِنٹ کریں
