پاکستان بمقابلہ انگلینڈ: ٹی 20 سیریز کے پہلے میچ میں بارش کے باعث گیلی آؤٹ فیلڈ، امپائرز کا میچ منسوخ کرنے کا فیصلہ
،تصویر کا ذریعہReuters
مانچسٹر کے میدان میں پہلے ٹی ٹوئنٹی میچ میں تیز بارش کے بعد گیلی آؤٹ فیلڈ کی وجہ نے امپائرز کو میچ منسوخ کرنے پر مجبور کر دیا۔
اولڈ ٹریفرڈ میں کھیلے جانے والے پہلے ٹی ٹوئنٹی میچ میں پاکستان نے ٹاس جیت کر انگلینڈ کو بیٹنگ کی دعوت دی تھی جن کی اننگز بارش کے باعث 16.1 اوورز میں 131 رنز پر تمام ہو گئی تھی۔
انگلینڈ کی اننگز کے اختتام پر میچ حکام کے مطابق ڈی ایل ایس میتھڈ کے مطابق پاکستان کو 16 اوورز میں جیت کے لیے 144 رنز کی ضرورت تھی۔
لیکن مسلسل بارش کے بعد گیلی آؤٹ فیلڈ کی وجہ سے امپائرز نے فیصلہ کیا کہ میچ دوبارہ شروع کرنا ممکن نہیں ہوگا۔
،تصویر کا ذریعہGetty Images
جب انگلینڈ کی ٹیم نے بیٹنگ کا آغاز کیا تو پہلے آؤٹ ہونے والے کھلاڑی جانی بیرسٹو تھے جو صرف دو رنز بنا کر عماد وسیم کی گیند پر آؤٹ ہو گئے۔
ڈیوڈ ملان آؤٹ ہونے والے دوسرے بلے باز تھے جو نے 23 سکورز بنا کر رن آؤٹ ہو گئے۔
تیسرے آؤٹ ہونے والے کھلاڑی ٹام بیٹن تھے جنھوں جارحانہ اننگز کھیلتے ہوئے 71 رنز بنائے۔ چوتھے آؤٹ ہونے والے بیٹسمین مورگن تھے جنھوں نے 14 رنز بنائے۔ افتخار احمد نے انھیں ایل بی ڈبلیو کیا۔
End of سب سے زیادہ پڑھی جانے والی
معین علی آؤٹ ہونے والے پانچویں کھلاڑی تھے جو شاداب خان کی گیند پر وکٹ کیپر محمد رضوان کو کیچ پکڑا بیٹھے۔ چھٹے آؤٹ ہونے والے کھلاڑی گریگوری تھے جنھیں محمد رضوان نے سٹمپ آؤٹ کیا۔
،تصویر کا ذریعہGetty Images
تین میچوں کی اس سیریز کے تمام میچز مانچسٹر کے اولڈ ٹریفورڈ گراؤنڈ میں ہی کھیلے جائیں گے۔
پاکستان اور انگلینڈ کے درمیان کھیلے گئے گذشتہ پانچ ٹی ٹوئنٹی میچوں میں پاکستان کو تین میں شکست کا سامنا کرنا پڑآ جبکہ ایک میچ جیتا اور ایک برابر ہوگیا تھا۔
انگلینڈ کے خلاف ٹی ٹوئنٹی سیریز کا دوسرا میچ 30 اگست اور تیسرا میچ یکم ستمبر کو کھیلا جائے گا۔
پاکستان کی ٹیم ان کھلاڑیوں پر مشتمل ہے: پاکستان: بابر اعظم (کپتان)، فخر زمان،محمد حفیظ، شعیب ملک، محمد رضوان، افتخار احمد، شاداب خان، عماد وسیم، محمد عامر، شاہین شاہ آفریدی اور حارث راؤف۔
یہ بھی پڑھیے
انگلینڈ نے ٹی ٹوئنٹی سیریز کے لیے ٹیسٹ سیریز میں حصہ لینے والے کسی کھلاڑی کو ٹیم میں شامل نہیں کیا ہے۔
انگلینڈ کی ٹیم: این مورگن (کپتان) ٹام بینٹن، جانی بیرسٹو، ڈیوڈ ملان، سیم بلنگز، معین علی، ٹام کرن، لیوس گریگوری، کرس جورڈن، عادل رشید اور ثاقب محمود۔
سیریز کا نتیجہ اور عالمی رینکنگ
ٹی ٹوئنٹی انٹرنیشنل کی عالمی رینکنگ میں پاکستان اس وقت چوتھے نمبر پر ہے۔ پاکستان کو ٹی ٹوئنٹی انٹرنیشنل کی صف اول کی ٹیموں میں شمار کیا جاتا ہے۔
،تصویر کا ذریعہGetty Images
اعدادوشمار کے مطابق پاکستان کو سب سے زیادہ ٹی ٹوئنٹی انٹرنیشنل میچز جیتنے کا اعزاز حاصل ہے۔ پاکستان نے اب تک 151 ٹی ٹوئنٹی انٹرنیشنل کھیلے ہیں جن میں اس نے 92 میں کامیابی حاصل کی ہے۔
کامیابی کے لحاظ سے پاکستان دوسرے نمبر کی ٹیم انڈیا سے واضح طور پرآ گے ہے جس نے 134 میں سے 83 ٹی ٹوئنٹی انٹرنیشنل میچ جیتے ہیں۔
انگلینڈ کی اس وقت عالمی رینکنگ دوسری ہے۔ اس نے 117 میں سے 58 میچز جیت رکھے ہیں۔
پاکستان اور انگلینڈ کے درمیان کھیلے گئے ٹی ٹوئنٹی انٹرنیشنل میچوں میں انگلینڈ کا پلڑا بھاری رہا ہے۔ دونوں کے درمیان کھیلے گئے 15 میں سے 10 ٹی ٹوئنٹی انٹرنیشنل انگلینڈ نے جیتے ہیں۔
پاکستان صرف 4 میچ جیتنے میں کامیاب ہو سکا جبکہ ایک میچ برابر ہوا۔
،تصویر کا ذریعہGetty Images
اگر پاکستان یہ سیریز تین صفر سے جیت لے تب وہ دوسرے نمبر پر آ جائے گا اور انگلینڈ کی پوزیشن چوتھی ہو جائے گی۔
لیکن اگر پاکستان یہ سیریز دو ایک سے جیتا تو پھر اس کی پوزیشن چوتھی ہی رہے گی لیکن انگلینڈ کی رینکنگ دوسرے نمبر سے تیسرے نمبر پر آ جائے گی۔
اگر انگلینڈ نے پاکستان کے خلاف ٹی ٹوئنٹی سریز میں کلین سویپ کر لیا تو وہ آئی سی سی کی درجہ بندی میں اگرچہ دوسرے نمبر پر ہی رہے گا لیکن اس کے اور عالمی نمبر ایک آسٹریلیا کے درمیان صرف چار پوائنٹس کا فرق رہ جائے گا۔
دو میچ جیتنے کی صورت میں یہ فرق آٹھ پوائنٹس کا ہو گا۔
پاکستان کی تین صفر کی شکست اسے عالمی رینکنگ میں پانچویں نمبر پر لے جائے گی۔
