ٹی ٹوئنٹی کرکٹ پر راج کرنے والے دو خان کون ہیں؟
،تصویر کا ذریعہAFP
- مصنف, ذیشان علی
- عہدہ, بی بی سی اردو، اسلام آباد
کرکٹ میں ٹی ٹوئنٹی فارمیٹ کو بلے بازوں کے لیے سازگار کھیل کہا جاتا ہے لیکن وہیں پر حیران کن بات یہ ہے کہ اس فارمیٹ میں فاسٹ بولرز کی بجائے سپنرز راج کر رہے ہیں۔
انٹرنیشنل کرکٹ کونسل یعنی آئی سی سی کی جانب سے حال ہی میں جاری ہونے والی ٹی ٹوئنٹی انٹرنیشنل میں بولرز کی عالمی رینکنگ میں سرفہرست دس بولرز میں سے آٹھ سپنرز ہیں، جبکہ صرف دو ہی ایسے فاسٹ بولرز ہیں جو ٹاپ ٹین بولرز میں شامل ہونے میں کامیاب ہو سکے ہیں۔
اس کے علاوہ حالیہ رینکنگ میں ایک اور دلچسپ بات یہ ہے کہ سرفہرست سات بولروں میں سے چھ رِسٹ سپنر یا لیگ سپنرز ہیں۔
یہ بھی پڑھیے
آئی سی سی کی رینکنگ میں پہلا نمبر افغانستان کے لیگ سپنر راشد خان کا ہے جن کے پوائنٹس 759 ہیں۔ راشد خان حال ہی میں ایک روزہ کرکٹ میں تیز ترین 100 وکٹیں لینے کا اعزاز بھی حاصل کر چکے ہیں۔
راشد خان اب تک 29 ٹی ٹوئنٹی انٹرنیشنل میچوں میں 49 وکٹیں حاصل کر چکے ہیں۔
End of سب سے زیادہ پڑھی جانے والی
ان کے بعد دوسرے نمبر پر پاکستان کے نوجوان لیگ سپنر شاداب خان ہیں جو راشد خان سے اب صرف 26 پوائنٹس ہی پیچھے ہیں۔ اس سے قبل شاداب خان 12ویں پوزیشن پر تھے لیکن اپنی حالیہ عمدہ کارکردگی کی بنیاد پر وہ انتہائی تیزی کے ساتھ دس پوزیشنز پھلانگتے ہوئے دوسرے نمبر پر آگئے ہیں۔
،تصویر کا ذریعہAFP
شاداب خان نے ویسٹ انڈیز کے خلاف کراچی میں کھیلی جانے والی تین ٹی ٹوینٹی میچوں کی سیریز میں پانچ وکٹیں حاصل کی تھیں جبکہ رواں سال وہ اب تک چھ میچوں میں 10 وکٹیں حاصل کر چکے ہیں، جبکہ مجموعی طور پر وہ 16 ٹی ٹوئنٹی انٹرنیشنل میچوں میں 24 وکٹیں لے چکے ہیں۔
ان کے علاوہ ٹاپ ٹین بولرز میں شامل پاکستانی بولر عماد وسیم ہیں جو اس وقت نویں پوزیشن پر ہیں۔
بنگلہ دیش کے مستفیض الرحمان اور متحدہ عرب امارات کے محمد نوید وہ دو فاسٹ بولرز ہیں جو ابتدائی دس بولرز کی فہرست میں شامل ہونے میں کامیاب رہے۔
