پاکستان بمقابلہ نیوزی لینڈ: 176 رنز کے تعاقب میں پاکستانی بیٹنگ ناکام، چار رنز سے شکست
،تصویر کا ذریعہAFP
نیوزی لینڈ نے پاکستان کو پہلے کرکٹ ٹیسٹ میچ میں چار رنز سے شکست دے کر سیریز میں ایک صفر کی برتری حاصل کر لی ہے۔
ابوظہبی میں کھیلے جانے والے میچ میں پیر کو چوتھے دن 176 رنز کے ہدف کے تعاقب میں پاکستان کی بیٹنگ ریت کی دیوار ثابت ہوئی اور 171 رنز ہی بنا سکی۔
یہ ٹیسٹ کرکٹ میں پاکستان کی رنز کے اعتبار سے سب سے کم رنز سے شکست اور نیوزی لینڈ کی سب سے کم رنز سے فتح ہے۔
کھانے کے وقفے تک بظاہر یہ لگ رہا تھا کہ پاکستان یہ میچ باآسانی جیت لے گا لیکن دوسرے سیشن میں نیوزی لینڈ کے اعجاز پٹیل نے پاکستانی بیٹنگ لائن اپ کو تباہ کر دیا۔
وہ دوسری اننگز میں مہمان ٹیم کے سب سے کامیاب بولر رہے۔ انھوں نے 59 رنز کے عوض پانچ وکٹیں حاصل کیں۔
پاکستان کی جانب سے اظہر علی 65 رنز کے ساتھ ٹاپ سکورر رہے لیکن اننگز کے آخر میں وہ ٹیم کو فتح یاب کرنے میں ناکام رہے اور دباؤ میں بہتر کھیل نہ پیش کر سکے۔
کھانے کے وقفے سے ایک گیند قبل جب اسد شفیق آؤٹ ہوئے تو اس وقت پاکستان کو مزید 46 رنز کی ضرورت تھی اور چھ وکٹیں باقی تھیں۔
End of سب سے زیادہ پڑھی جانے والی
لیکن دوسرے سیشن میں پاکستان بلے بازوں نے انتہائی غیر ذمے دارانہ بیٹنگ کا مظاہرہ کیا اور یکے بعد دیگرے آؤٹ ہوتے چلے گئے۔
پہلے بابر اعظم اور اظہر علی کے درمیان مکس اپ ہوا اور بابر 13 رنز پر رن آؤٹ ہو گئے۔ اس کے بعد کپتان سرفراز احمد بھی وکٹ کیپر کو کیچ دے بیٹھے۔
،تصویر کا ذریعہAFP
بلال آصف نے اپنی دوسری ہی گیند پر زوردار شاٹ لگانے کی کوشش کی اور صفر پر ان کو اعجاز پیٹل نے بولڈ کر دیا۔
اس کے بعد آنے والے یاسر شاہ فاسٹ بولر نیل ویگنر کے سپیل کے آٹھویں اوور میں سلپ میں کیچ دے گئے۔
اس سے قبل پیر کو پاکستان کی جانب سے اوپنرز محمد حفیظ اور امام الحق نے 37 رنز سے اننگز دوبارہ شروع کی تو تین رنز کے اضافے کے بعد جیتن پٹیل نے امام الحق کو 27 کے سکور پر ایل بی ڈبلیو کر دیا۔
اگلے اوور میں ایش سوڈھی نے پہلے محمد حفیظ اور پھر حارث سہیل کو آؤٹ کر کے پاکستانی ٹیم کو مشکلات میں ڈال دیا۔
تاہم اس کے بعد اسد شفیق اور اظہر علی نے محتاط مگر پراعتماد انداز سے کھیلتے ہوئے 82 رنز کی شراکت قائم کی۔ اس شراکت کا خاتمہ کھانے کے وقفے سے قبل ویگنر نے اسد شفیق کو واٹلنگ کے ہاتھوں کیچ کروا کے کیا۔ اسد نے 45 رنز بنائے۔
اس سے قبل کھیل کے تیسرے دن نیوزی لینڈ کی ٹیم دوسری اننگز میں 249 رنز بنا کر آؤٹ ہو گئی تھی اور یوں پاکستان کو اس میچ میں فتح کے لیے 176 رنز کا ہدف ملا تھا۔
،تصویر کا ذریعہAFP
نیوزی لینڈ کی جانب سے بی جے واٹلنگ 59 رنز کے ساتھ ٹاپ سکورر رہے جبکہ نکلز نے 55 اور جیت راول نے 46 رنز کی اہم اننگز کھیلیں۔
یہ بھی پڑھیے
پاکستان کی طرف سے حسن علی نے 45 رنز دے کر جب کہ یاسر شاہ نے 110 رنز دے کر پانچ، پانچ وکٹیں حاصل کیں۔
کرس واٹلنگ اور نکلز نے پانچویں وکٹ کی شراکت میں 112 رنز کا اضافہ کر کے نیوزی لینڈ کو میچ میں واپس لانے میں اہم کردار اد کیا، تاہم نکلز کے 55 رنز بنا کر آؤٹ ہونے کے بعد بقیہ پانچ وکٹیں سکور میں صرف 30 رنز کا اضافہ کر سکیں۔
،تصویر کا ذریعہGetty Images
اس ٹیسٹ میں پاکستان نے اپنی پہلی اننگز میں نیوزی لینڈ کے پہلی اننگز کے سکور 153 رنز کے جواب میں 227 رنز بنائے تھے۔ اس طرح اسے نیوزی لینڈ پر پہلی اننگز میں 74 رنز کی برتری ملی تھی۔
پاکستان کی طرف سے پہلی اننگز میں نمایاں بلے باز بابر اعظم رہے تھے جنھوں نے 62 رنز بنائے تھے۔ ان کے علاوہ اسد شفیق نے 43 جب کہ حارث سہیل نے 38 رنز کی اننگز کھیلی تھی۔
اس سے قبل دونوں ٹیموں کے درمیان تین ٹی 20 اور تین ہی ایک روزہ میچوں کی سیریز بھی کھیلی گئی جس میں پاکستان نے نیوزی لینڈ کو ٹی ٹوئنٹی میچوں کی سیریز میں تین صفر سے شکست دی جبکہ ون ڈے سیریز ایک، ایک میچ سے برابر رہی تھی۔
