یہ جعلی فائل یا تو موسیقی، کم دورانیے کی ویڈیو یا فلم کی شکل میں ہوتی ہے

یہ جعلی فائل یا تو موسیقی، کم دورانیے کی ویڈیو یا فلم کی شکل میں ہوتی ہے اور کمپیوٹر استعمال کرنے والوں کو جال میں پھنساتی ہے۔

میک ایفی کا کہنا ہے کہ جعلی فائل کا موجودہ پھیلاؤ پچھلے تین سالوں میں سب سے زیادہ ہے۔ ان کا کہنا ہے کہ اس جعلی فائل کو کھولتے ہی بے تہاشہ اشتہار کھل جاتے ہیں اور ان کی وجہ سے اس کمپیوٹر تک رسائی ممکن ہو جاتی ہے۔

یہ جعلی فائل ای ڈونکی اور لائم وائر کے فائل شیئرنگ کے نیٹ ورک میں پھیلائی گئی ہیں۔ ان فائلوں کے مختلف نام ہیں اور مختلف زبانوں میں ہیں تاکہ لوگ پھنس سکیں۔

ان کے ناموں سے لگتا ہے کہ یہ یا تو گانا ہے، یا جنسی فلم اور یا پھر کوئی مشہور فلم ہے۔ اور جو بھی اس فائل کو کھولتا ہے اس سے کہا جاتا ہے کہ وہ کوڈک نامی سافٹ ویئر کمپیوٹر پر منتقل کریں جس سے یہ فائل دیکھ پائیں گے۔

لیکن اس سافٹ ویئر سے اشتہار کھلنے شروع ہو جاتے ہیں اور کمپیوٹر میں پھیل جاتے ہیں۔

میک ایفی کا کہنا ہے کہ اتنے بڑے پیمانے پر اس قسم کی فائلیں پہلے کبھی نہیں پھیلائی گئیں کیونکہ یہ کام کرنے والے افراد محدود تعداد میں یہ کام کرتے ہیں تاکہ ان کی نشاندہی نہ ہو سکے۔

پچھلے سات دنوں میں میک ایفی کے مطابق پچاس ہزار کمپیوٹرز اس فائل کے جال میں پھنسے ہیں تاہم صرف دس فیصد نے کوڈک نامی سافٹ ویئر کمپیوٹر پر منتقل کیا۔

وہ کمپیوٹرز جن میں ونڈوز سافٹ ویئر موجود ہیں ان کا اس جال میں پھنسنے کا زیادہ امکان ہے۔