دبئی میں کم سے کم پانچ آئی ایس پی متاثر ہوئے ہیں

ماہرین کا کہنا ہے کہ متاثرہ کیبل کو مرمت کرنے اور مکمل سروس بحال کرنے میں ایک ہفتہ لگ سکتا ہے۔

مصر اور فرانس کے قریب اسکندریہ کے مقام پر پیدا ہونے والی فنی خرابی کا سراغ لگانے اور اُس کی مرمت کے لیے غوطہ خور انجینئر کام کر رہے ہیں۔

خرابی سے مصر کے انٹرنیٹ نیٹ ورک کا ستّر فیصد حصہ جبکہ انڈیا کا تقریباً ساٹھ فیصد حصہ متاثر ہوا ہے۔

انٹرنیٹ کے علاوہ بین الاقوامی ٹیلیفون سروس بھی متاثر ہوئی ہے، جس سے نمٹنے کے لیے مختلف ممالک کے درمیان ٹیلیفون کالز کے لیے متبادل ذرائع استعمال کیے جا رہے ہیں۔

پاکستان میں بدھ کوانٹرنیٹ سروسز متاثر ہونے سے بڑے چھوٹے کاروباری اداروں میں سرگرمیاں متاثر ہوئیں اور انٹرنیٹ سسٹم معمول سے کہیں کم رفتار سے کام کر رہا تھا۔

اس سلسلے میں پی ٹی سی ایل کے ایک اعلی اہلکار علی قادر گیلانی سے جب معلوم کیا گیا کہ جب پاکستان میں اس خرابی کا کوئی براہِ راست اثر نہیں ہوا تو انٹر نیٹ لوڈ کو seame.we3 سے seame.we4 پر منتقل کرنے کی ضرورت کیوں پیش آئی، تو اُن کا جواب تھا کہ یہ بین الاقوامی خرابی ہے اور پاکستان کے پاس اس کا متبادل موجود ہے جس پر ہم نے لوڈ کو منتقل کر دیا ہے۔

پاکستان میں اثرات  یہ بین الاقوامی خرابی ہے اور پاکستان کے پاس اس کا متبادل موجود ہے جس پر ہم نے لوڈ کو منتقل کر دیا ہے۔ پی ٹی سی ایل کے نیٹ ورک پر کوئی دباؤ نہیں ہے اور پاکستان کا براڈ بینڈ بھی اپنا کام کر رہا ہے۔وہ صارف جو پی ٹی سی ایل کے علاوہ براہ راست کسی بین الاقوامی فرم سے سروسز حاصل کر رہے ہیں اُن کی سروسز زیادہ متاثر ہیں پی ٹی سی ایل

ایسوسی ایٹڈ پریس کے مطابق متاثر ہونے والے دیگر ممالک میں متحدہ عرب امارات، کویت اور سعودی عرب بھی شامل ہیں۔ دبئی میں کم سے کم آئی ایس پی متاثر ہوئے ہیں۔

اگرچہ کسی بین الاقوامی کیبل آپریٹر نے یہ نہیں بتایا کہ مصر کے شہر اسکندریہ اور اٹلی میں پالرمو کے مقام کے درمیان زیر سمندر کیبل کس مقام پر ٹوٹی ہے اور اس کا سبب کیا تھا، تاہم کچھ اطلاعات کے مطابق یہ کیبل اسکندریہ کے ساحل کے قریب ایک بحری جہاز کے لنگر سے ٹکرانے سے متاثر ہوئی۔

مصر کی ٹیلی کمیونیکیشن کی وزارت کا کہنا ہے کہ انٹرنیٹ سروس کو مکمل بحال ہونے میں کئی دن لگ سکتے ہیں۔ وزارت کا کہنا تھا کہ امدادی ٹیمیں موقع پر پہنچ چکی ہیں اور انٹرنیٹ سروس اور ٹیلیفون کالز کے لیے متبادل رُوٹ تلاش کر رہی ہیں۔