فلپز اور سونی نے ایک دوسرے کے اشتراک سے سی ڈی بنائی تھی۔

اس وقت سے لے کر اب تک دنیا میں دو سو بلین سے زائد سی ڈیز فروخت کی جا چکی ہیں۔

سب سے پہلی سی ڈی میوزکل بینڈ ’آبا‘ کی موسیقی پر مشتمل تھی جس کا نام ’دی وزیٹرز‘ تھا۔

پیٹ کرامر فلپس کمپنی میں سب سے پہلی سی ڈی بنانے والے گروپ میں شامل تھے۔ ان کا کہنا ہے کہ ’ جب سی ڈی بنانے کے لیے فلپس کمپنی نے سونی کے ساتھ اشتراک کیا تو اس وقت ہمارا ٹارگٹ سی ڈی کے لیے دنیا جیتنے کا تھا‘۔

ان کا کہنا تھا کہ اس وقت دونوں کمپنیوں کے گمان میں بھی نہیں تھا کہ کمپیوٹر اور فن کی دنیا کی صنعتیں بھی اپنے کام کو محفوظ کرنے کے لیئے سی ڈی کا انتخاب کریں گی۔

دونوں کمپنیوں نے 1979 میں ایک گھنٹے دورانیے کا آڈیو مواد محفوظ کرنے کے مقصد سے سی ڈی کے فارمیٹ پر کام کرنا شروع کیا تھا۔ بعدازاں بیتھوون کی ’نائنتھ سمفنی‘ کی سی ڈی پر مکمل ریکارڈنگ کے لیے سی ڈی کی ریکارڈنگ صلاحیت کو بڑھا کر 74 منٹ کر دیا گیا۔

نومبر 1982 میں پہلی مرتبہ سی ڈیز کو فروخت کیا گیا جن میں سے اکثر کلاسیکل ریکارڈنگ پر مبنی تھیں۔

گزشتہ دس برسوں میں دنیا بھر میں سی ڈیز کی فروخت میں کمی آئی ہے اور اس کے برعکس انٹرنیٹ پر موجود ڈیجیٹل میوزک کی فروخت میں اضافہ ہوا ہے۔

انٹرنیشنل فیڈریشن آف دی فونوگرافک انڈسٹری کے مطابق 2010 تک دنیا بھر میں میوزک کی فروخت کا ایک چوتھائی حصہ ڈیجیٹل میوزک کی فروخت پر مبنی ہوگا۔

رواں سال کے پہلے حصے میں برطانیہ میں سی ڈیز کی فروخت میں دس فیصد کمی آئی ہے جبکہ ڈاؤن لوڈنگ کے ذریعے ڈیجیٹل میوزک کی فروخت میں پچاس فیصد اضافہ ہوا ہے۔