ماحولیاتی تبدیلیوں سے زیادہ خطرہ ترقی پذیر ممالک کو ہے

دستاویزات کے مطابق امریکہ جون میں جرمنی میں ہونے والی جی ایٹ سربراہ کانفرنس کے لیے تیار کردہ مسودے میں بڑی تبدیلیاں چاہتا ہے بلکہ اسے ان پر ’بنیادی اختلافات‘ ہیں۔ لیکن جرمنی چاہتا ہے کہ تمام رکن ممالک مضر گیسوں کے اخراج میں واضح کمی کرنے کے لیے ایک نظام الاوقات پر متفق ہو جائیں۔

ماحول کے بچاؤ کی بین الاقوامی تنظیم ’گرین پِیس‘ کے ہاتھ لگنے والی ان خفیہ دستاویزات سے ظاہر ہوتا ہے کہ برطانوی وزیر اعظم ٹونی بلیئر بھی امریکہ کو اپنا مؤقف بدلنے کے لیے قائل کرنے میں ناکام رہے ہیں۔

مذکورہ دستاویز میں امریکہ نے جرمنی کی مجوزہ سفارشات میں بڑی تبدیلیاں کی ہیں۔

امریکی انتظامیہ عالمی سطح پر وجود میں آنے والے سائنسی اتفاق رائے اور خود امریکہ میں آب و ہوا میں تبدیلی پر بڑھتی ہوئی فکرمندی، دونوں کو واضح طور پر رد کر رہی ہے گرین پِیس

تاہم دوسری جانب واشنگٹن سے خبر رساں ادارے اے ایف پی نے بتایا ہے کہ کانگریس کے سینیئر ارکان نے صدر بش کو لکھا ہے کہ وہ ماحولیات کے سلسلے میں موجودہ امریکی انتظامیہ کے مؤقف سے مایوس ہیں۔

نامہ نگاروں کا کہنا ہے کہ تجاویز کے مسودے پر جاری لے دے سے لگتا ہے کہ چھ تا آٹھ جون کی سربراہ کانفرنس کے دوران ان پراتفاقِ رائے پیدا کرنے کے لیے خاصی جد وجہد ہو گی۔

جرمنی کی چانسلر اینجلا مرکل کی خواہش ہے کہ جی ایٹ کی صدارت کے دوران ان کا ملک ماحولیاتی تبدیلیوں کے سلسلے میں جی ایٹ ممالک کو بڑے اقدامات کے لیے رضامند کرنے میں کامیاب ہو جائے۔ ان اقدامات میں درج ذیل شامل ہیں:

• موجودہ صدی کے دوران عالمی درجہ حرارت میں دو ڈگری سینٹی گریڈ کے اوسط اضافے پر معاہدہ
• سنہ دو ہزار پچاس تک عاملی سطح پر گیسوں کے اخراج کو انیس سو نوے کی شرح کے کم از کم پچاس فیصد تک رکھنا
• سنہ دو ہزار بیس تک توانائی اور ذرائع آمد ورفت میں استعمال ہونے والے وسائل کی استطاعت میں بیس فیصد تک اضافہ کرنا

گرین پیس کے ڈائریکٹر جان ساون نے جرمنی کی تجاویز پر امریکی رویہ کو ’مجرمانہ‘ قرار دیا ہے۔

ان کا کہنا تھا ’ امریکی انتظامیہ عالمی سطح پر وجود میں آنے والے سائنسی اتفاق رائے اور خود امریکہ میں آب و ہوا میں تبدیلی پر بڑھتی ہوئی فکرمندی، دونوں کو واضح طور پر رد کر رہا ہے۔‘

	ٹونی بلیئرامریکہ کو اپنا مؤقف بدلنے کے لیے قائل کرنے میں ناکام رہے ہیں

ڈائریکٹر نے مزید کہا کہ چانسلر مسز مرکل کو کانفرنس کے موقع پر یہ بات واضح کر دینی چاہیئے کہ ماحول کے مسئلے پر جو مؤقف امریکہ نے اپنایا ہے باقی ممالک اس متفق نہیں ہیں۔

گزشتہ جمعرات کو ٹونی بلیئر نے اشارہ دیا تھا کہ ہو سکتا کہ امریکہ ماحول سے متعلق اپنی پالیسی میں تبدیلی کرے۔

واضح رہے کہ امریکہ نے سنہ دو ہزار ایک کے کیوٹو معاہدے پر دستخط نہیں کیے ہیں جس میں سنہ دو ہزار بارہ تک کاربن اور دوسری مضرگیسوں کے اخراج میں کمی کے اہداف پر اتفاق ہوا تھا۔

جمعرات کو ٹونی بلییر نے کہا تھا ’ میرا خیال نہیں کہ امریکہ کے اگلے صدارتی انتخابات میں ایسے کئی افراد حصہ لیں گے جن کے منصوبوں کا حصہ ماحولیاتی تبدیلی نہیں ہوگا۔‘

ان کا مزید کہنا تھا ’میرا خیال ہے یہ ممکن ہے کہ ہمیں جی ایٹ کانفرنس کے موقع پر کچھ قدامات دیکھنے کو ملیں، اور اگر اقدامات نہیں تو کم سے کم ان کا آغاز ہی۔‘