’یو ٹیوب‘ کے صارفین ایک دن میں دس کروڑ سے زائد ویڈیوز دیکھتے ہیں

اس بات کا اعلان کرتے ہوئے ٹائم نے عوام کو سراہا کہ انہوں نے عالمی میڈیا میں پیدا ہونے والے نئے مواقع سے بھرپور فائدہ اٹھاتے ہوئے انٹرنیٹ کی ورچوئل دنیا کو آباد کیا۔

ٹائم سال کی سب سے اہم شخصیت کا انتخاب انیس سو ستائیس سے ہرسال کر رہا ہے جس کا مقصد ایسی شخصیات کی نشاندہی کرنا ہوتا ہے جو اس سال کے دوران سب سے زیادہ خبروں میں رہتے ہیں۔ ٹائم کے بعض انتخابات پر تنقید ہوتی رہی ہے۔

اس سال جن شخصیات کے درمیان مقابلہ تھا ان میں ایران کے صدر محمود احمدی نژاد اور چین کے صدر ہُو جنتاؤ بھی شامل تھے۔

گزشتہ سال خبروں پر سب سے زیادہ اثرانداز ہونے والی شخصیات میں مائیکروسوفٹ کے بانی بِل گیٹس اور ان کی اہلیہ میلنڈا کے علاوہ روک سنگر بونو شامل تھے۔ سنہ دو ہزار چار میں امریکی صدر جارج بُش جبکہ اس سے ایک سال قبل ’دی امیرکن سولجر‘ نامی فلم کو اس اعزاز کا حق دار قرار دیا گیا تھا۔

اس اعزاز کے لیے ’آپ لوگوں‘ کے انتخاب پر تبصرہ کرتے ہوئے ٹائم کا کہنا ہے کہ کسی شخصیت کی بجائے مجموعی طور پر عوام کا انتخاب اس بات کی عکاسی کرتا ہے کہ کس طرح انٹرنیٹ دنیا میں طاقت کے توازن کو بدل رہا ہے جہاں بلاگز اور انٹرنیٹ پر لوگوں کی بنائی ہوئی ویڈیوز وغیرہ ذرائع ابلاغ میں اپنا اثر و رسوخ بڑھا رہے ہیں۔

’یو‘ کے ساتھ ساتھ ٹائم نے اس سلسلہ میں ’یو ٹیوب‘(you tube) ، فیس بک (facebook)، مائی سپیس (my space)، اور وکی پیڈیا (wikipedia) جیسی ویب سائٹس کا ذکر کیا جو صارفین کو اپنی بنائی ہوئی ویڈیوز، تصاویر اور دوسری تخلیقات کو انٹرنیٹ کے ذریعے دوسرے لوگوں تک پہنچانے کا موقع فراہم کرتی ہیں۔

ٹائم کے کالم نگار گروسمین کے مطابق انٹرنیٹ سائٹس کا انتخاب یہ ظاہر کرتا ہے کیسے طاقت چند شخصیات کے ہاتھوں سے نکل کر عام لوگوں کو منتقل ہو رہی ہے جو ایک دوسرے کی مدد کر رہے ہیں۔ اس سے نہ صرف ہمیں یہ پتا چلتا ہے کہ دنیا کس تیزی سے بدل رہی بلکہ یہ بھی پتا چلتا ہے کہ یہ تبدیلی آ کیسے رہی ہے۔

ٹائم کا کہنا ہے کہ ہمیں ویب سائٹس کے بڑھتے ہوئے اثرات کا ذکر کرتے ہوئے اس آلے کو نہیں بھولنا چاہیے جس نے یہ سب کچھ ممکن بنایا یعنی ’ویب‘۔ کالم نگار کے مطابق ’ویب وہ آلہ ہے جو لاکھوں لوگوں کی چھوٹی چھوٹی تخلیقات کو ایک دوسرے تک پہنچاتا ہے۔‘

ٹائم سال کی سب سے بڑی شخصیت کا انتخاب کرتے وقت جومعیار مدنظر رکھتا اس کے مطابق ’ اس اعزاز کی حق دار وہ شخصیت یا شخصیات ہوتی ہیں جو خبروں اور ہماری زندگی پر سب سے زیادہ گہرے اثرات چھوڑیں، قطع نظر اس کے کہ وہ اثرات اچھے تھے یا برے۔‘ شاید یہی وجہ ہے کہ ٹائم کی طرف سے انیس سو اڑتیس میں ہٹلر اور انیس سو اناسی میں آیت اللہ خمینی کو سال کی سب سے بڑی شخصیت قرار دینے کے فیصلوں کو متنازعہ خیال کیا جاتا ہے۔