انوشے نےخلائی سفر کے لیئے بیس ملین ڈالر کی رقم ادا کی ہے

اس خلائی مشن میں کاروباری خاتون انوشے انصاری کے ساتھ بین الاقوامی خلائی سٹیشن کا عملہ بھی ہے۔

ایران میں پیدا ہونے والی چالیس سالہ انوشے انصاری امریکی شہری ہیں اور خیال ہے کہ انہوں نے خلائی سفر کے لیئے بیس ملین ڈالر کی رقم ادا کی ہے۔

راکٹ نے بیکونور سے مقامی وقت کے مطابق دس بج کر دس منٹ پر خلاء کے لیئے اڑان بھری۔ حکام کا کہنا ہے کہ روسی راکٹ سویوز کامیابی سے مدار میں داخل ہو گیا ہے۔

توقع ہے کہ یہ خلائی مشن بدھ تک بین الاقوامی خلائی سٹیشن پر پہنچ جائے
گا۔ حکام نےامید ظاہر کی کہ اتوار کو بین الاقوامی خلائی سٹیشن سے روانہ ہونے والی اٹلانٹس شٹل بھی بدھ کو زمین پر پہنچ جائے گی۔

انوشے انصاری کے ساتھ اس سفر میں روسی خلا باز میخیل ترن اور امریکی خلاباز مائیکل لوپز بھی ہیں جو بین الاقوامی خلائی سٹیشن میں جرمن خلاباز تھامس ریئٹر سے جا ملیں گے۔ مس انصاری خلاء میں جانے والی چوتھی خلائی سیاح ہیں۔

خلائی سفر پر روانگی سے قبل مس انصاری کا کہنا تھا کہ وہ خلائی پروگرامز کے لیئے نجی سرمایہ کاری کو فروغ دینے کے لیئے وہاں جا رہی ہیں۔

	انوشے کی خلاء سے واپسی 28 ستمبر کو ہوگی

مس انصاری کو جاپان کی ایک کاروباری خاتون کی جگہ منتخب کیاگیا ہے جو اپنی کسی طبی پیچیدگی کی وجہ سے اس سفر پر نہیں جا پائیں گی۔

روسی خلاباز ترن کا کہنا تھا کہ خلائی سفر کی تربیت کےدوران مس انصاری نے انتہائی پیشہ ورانہ رویئے کا مظاہرہ کیا۔

مس انصاری کی خلائی سفر سے واپسی دو دیگر خلا بازوں کے ہمراہ اٹھائیس ستمبر کو ہو گی۔