 | | | | | | | |||||||||||||||||||||||||||||||||||
| | ||||||||||||||||||||||||||||||||||||||||
|
برڈ فلو کے لیئےگلیکسو کی دوا | ||||||||||||||||||||||||||||||||||||||||
برطانیہ کی دوا بنانے والی کمپنی گلیکسوسمتھ کلائن کا کہنا ہے کہ اس نے برڈ فلو کے وائرس ایچ فائیو این ون کے خاتمے کا ٹیکہ بنا لیا ہے۔ کمپنی کا کہنا ہے کہ یہ ٹیکہ سنہ 2007 تک بازار میں دستیاب ہو سکے گا۔ بی بی سی کے بزنس ایڈیٹر رابرٹ پیسٹن کا کہنا ہے کہ اس ٹیکے کی تین اعشاریہ آٹھ مائیکروگرام کی دو خوراک کار آمد ثابت ہوئی ہیں۔ یہ تحقیق بیلجیئم کی ایک تجربہ گاہ میں کی گئی۔ گلیکسو کا کہنا ہے کہ یہ خوراک بے حد موثر ثابت ہوئی ہے ۔حالانکہ اس تحقیق کا نتیجہ ابھی منظر عام پر نہیں آیا ہے۔ کمپنی کے مطابق حکومت اس ٹیکے کے لیئے 2007 کے اوائل میں آرڈر کر سکتی ہے۔کمپنی اس معاملے میں مختلف حکومتوں سے بات چیت کرنے والی ہے۔ کمپنی کے چیف ایگزیکیوٹیو جین پائرے گارنر کا کہنا ہے کہ آئندہ چند مہینوں میں لائسنس سے متعلق کارروائی پوری ہو جائے گی۔
ادھر گلیکسو کی حریف فرانس کی کمپنی سانوفی اوینٹس بھی اس ٹیکے پر کام کر رہی ہے۔ گزشتہ مئی میں جریدے ’لانسینٹ‘میں شائع ہونے والے ایک مطالعہ کے مطابق اس ٹیکے کی سات اعشاریہ پانچ مائیکرو گرام کی خوراک کچھ مریضوں پر مؤثر ثابت ہوئی ہے۔ 2003 کے بعد سے اب تک برڈ فلو کے 231 معاملے سامنے آ چکے ہیں جبکہ اب تک اس مرض سے 133 لوگوں کی جان بھی جا چکی ہے۔ بی بی سی کے بزنس ایڈیٹر کا کہنا ہے کہ گلیکسو کو امید ہے کہ اس ٹیکے کی بہت زیادہ مانگ ہوگی۔ امریکہ اور برطانیہ پہلےسے ہی ایسے ٹیکے کی ضرورت محسوس کر رہے ہیں۔گلیکسو کے چیف ایگزیکٹو جین پائرے گارنر نے کہا کہ امریکہ میں برڈ فلو کے خلاف پروگرام کے سلسلے میں وہ صدر بش سے ملاقات کر چکے ہیں۔ امریکی حکومت کی طرف سے اس ٹیکے سے متعلق تحقیق کے لیئے اسے دو سو ستتر ملین ڈالر کا فنڈ دیا گیا ہے۔
بی بی سی کے بزنس ایڈیٹر کہتے ہیں کہ حالانکہ اس ٹیکے کے بارے میں کمپنی کافی پر امید ہے لیکن اب بھی چند سوال ایسے ہیں جن کے جواب صاف طور پر سامنے نہیں آئے ہیں۔ ان میں ایک سوال تو یہ ہے کہ ابھی تک یہ نہیں بتایا گیا ہے کہ ضرورت پڑنے پر ٹیکے کی زیادہ سے زیادہ درکار خوراک کتنی جلد بنائی جا سکے گی۔ دوسرا اہم سوال یہ ہے کہ وائرس اگر ان دواؤں کا عادی ہونے لگے تو ایسی صورت میں یہ ٹیکہ کس حد تک موثر ہوگا۔ کمپنی کا کہنا ہے کہ ایک ٹیکے کی قیمت 4 پاؤنڈ کے قریب ہو گی۔ گلیکسو برڈ فلو کا ٹیکہ بنانے والی دنیا کی دوسری سب سے بڑی کمپنی ہے جبکہ سانوفی دنیا کی سب سے بڑی کمپنی ہے جو برڈ فلو کے وائرس کی روک تھام کے لیئے ٹیکے بناتی ہے۔ |  اسی بارے میں  ہالینڈ میں مرغیاں گھر میں رہیں گی22 August, 2005 | نیٹ سائنس فلو: 150 ملین لوگ مرسکتے ہیں30 September, 2005 | نیٹ سائنس برڈ فلو: واحد دوا کے خلاف مدافعت 22 December, 2005 | نیٹ سائنس برڈ فلو ہے کیا؟10 January, 2006 | نیٹ سائنس برڈ فلو وائرس کی ایک اور شکل21 March, 2006 | نیٹ سائنس | ||||||||||||||||||||||||||||||||||||||||
| |||||||||||||||||||||||||||||||||||||||||
| |||||||||||||||||||||||||||||||||||||||||
