نواک جوکووچ: سربیا میں دریافت بیٹل کی نئی قسم کو ٹینس سٹار کا نام دے دیا گیا
،تصویر کا ذریعہNikola Vesović
- مصنف, دیجانا وکادینووک اور پیٹرا زیووک
- عہدہ, بی بی سی سربین
ٹینس سٹار نواک جوکووچ کے ملک سربیا میں ایک نئی نسل کا بیٹل دریافت کیا گیا ہے اور شاید اسی لیے اس نئی قسم کو ’جوکووچ‘ کا نام ملا ہے۔
ماہر حیاتیات اور محقق نکولا وسونک کا کہنا ہے کہ ’استقامت اور مشکل گھڑی میں لڑنے کی صلاحیت دو ایسی اہم خوبیاں ہیں جو کھیلوں کے ساتھ ساتھ قدرت کے نظام میں بقا کے لیے درکار ہوتی ہیں۔‘
ان کے مطابق اس کیڑے کے لیے دنیا کے بہترین ٹینس کھلاڑیوں میں سے ایک کے نام کا انتخاب کیا گیا۔
بی بی سی سربین سے بات کرتے ہوئے وسونک نے بتایا کہ ’جوکووچ نے مختلف مشکلات جھیلیں، جیسے یہ کیڑے تاریکی میں زندہ رہنے کے لیے برداشت کرتے ہیں۔‘
اس کیڑے کو ’ڈووالیئس جوکویسائی‘ کا لاطینی نام دیا گیا ہے۔ یہ ننھے اور ہلکے نارنجی رنگ کے بیٹل ہیں جن کے پاس آنکھیں نہیں لیکن وہ اس کمی کو سونگھنے کی طاقتور حس سے پورا کرتے ہیں۔
یہ کیڑے مغربی سربیا میں پوولن کے پہاڑ پر بند جگہوں پر رہتے ہیں اور انھیں پہلی بار یونیورسٹی آف بلغراد کے محققین نے دو سال قبل دریافت کیا۔
اس تحریر میں ایسا مواد ہے جو Instagram کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Instagram ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
Instagram پوسٹ کا اختتام
وسونک نے کہا ہے کہ ’یہ خاص ہیں کیونکہ یہ گہری سرنگوں اور غاروں میں رہتے ہیں اور یہ صرف سربیا میں پائے جاتے ہیں۔‘
انھوں نے اپنی ٹیم کے ساتھ اس نئی نسل کا جائزہ لیا ہے اور انھیں معلوم ہوا ہے کہ یہ کیڑے مشکل حالات میں زندہ رہنے کے قابل ہوتے ہیں۔
End of سب سے زیادہ پڑھی جانے والی
وسونک کے مطابق ’یہ ایسا ہی ہے جیسے جوکووچ کی صلاحیت اور جذبے کی بدولت وہ ٹینس کی دنیا میں سب سے اوپر برقرار ہیں۔‘
اپنے کیریئر کے آغاز سے سربیا کے ٹینس سٹار خود کو درپیش مشکلات کے بارے میں کھل کر بات کرتے آئے ہیں۔
انھوں نے سنہ 1999 میں نیٹو کی بمباری کے دوران ایک نوجوان کھلاڑی کی حیثیت سے کیریئر شروع کیا۔
سربیا میں کئی لوگ جوکووچ کو قومی ہیرو سمجھتے ہیں، اس کے باوجود کہ انھوں نے کووڈ 19 کی ویکسین لگوانے سے انکار کیا اور تنازعے کی زد میں آئے۔
،تصویر کا ذریعہGetty Images
بیٹل کے بارے میں ہم کیا جانتے ہیں؟
یہ نئی نسل ٹریچینی میں شامل ہے جو بیٹل کی قریب 2400 اقسام پر مشتمل ایک بڑا گروہ ہے۔
وہ تاریک مقامات پر رہتے ہیں جہاں کوئی روشنی نہیں اور ان کے پاس آنکھیں نہیں تاہم دو دیگر حسوں کی مدد سے اس کی کمی کو پورا کرتے ہیں۔
اس گروہ کی دیگر اقسام کے مقابلے ان کا رنگ الگ ہے کیونکہ باقی بیٹل سیاہ ہوتے ہیں۔ ان میں کچھ قدرتی رنگ ہوتا ہے۔
دو سال قبل ڈاکٹر وسونک نے نر بیٹل جمع کیے لیکن اسے نئی نسل قرار دینے کے لیے انھیں مادہ کی بھی ضرورت تھی۔
’قسمت سے ہمیں مادہ بیٹل مل گئے۔ ہم نے جائزے کے بعد نتیجہ نکالا کہ یہ کچھ الگ ہے اور سائنس کی دنیا میں کچھ نیا ہے۔‘
انھوں نے کہا کہ عام لوگ اس کا فرق اسی خاندان کے دوسرے کیڑوں سے نہیں کر سکیں گے۔
وسونک کے مطابق ’فرق اتنا ظاہر نہیں لیکن سائنسدان اسے دیکھ سکتے ہیں‘ لیکن وہ بتاتے ہیں کہ یہ نئی نسل بڑی تعداد میں نہیں پائی جاتی ہے۔ وسونک نے کہا ہے کہ ’ہم دیکھنا چاہیں گے کہ ان کی آماجگاہ کی حفاظت کی جائے۔‘
،تصویر کا ذریعہJozef Grego and Vladimir Pesic
جوکووچ کے نام پر ایک اور نسل
سربیا کے ہمسایہ ملک مونٹینیگرو کے سائنسدانوں نے حال ہی میں گھونگھے (سنیل) کی ایک نئی نسل دریافت کی تھی جسے جوکووچ کا نام دیا گیا تھا۔
یہ نایاب نسل سنہ 2021 میں مونٹینیگرو میں دریافت کی گئی اور تازہ پانی میں رہتی ہے۔
مگر جوکووچ واحد معروف شخصیت نہیں جن کے نام کو جانوروں کی نئی نسلوں کے لیے استعمال کیا گیا ہے۔
بینڈ رولنگ سٹونز کے لیڈ گلوکار مِک جیگر سے ایک دوسرے گھونگھے کو نام ملا جبکہ ان کے گروپ گٹارسٹ کیتھ رچرڈز کے نام کو 250 ملین برس قبل پائی جانے والی سمندری حیات سے منسوب کیا گیا۔
ماحولیاتی کارکن گریٹا تھنبرگ کے اعزاز میں مکھی کی ایک نئی نسل کو ان کا نام ملا۔
سابق امریکی صدر براک اوباما کے نام کو جانوروں کی 14 نئی نسلوں کے لیے استعمال کیا جاتا ہے جن میں کیلیفورنیا میں ایک مکڑی اور ہوائی میں ایک مچھلی شامل ہے۔
