مصر میں ڈھائی ہزار سال پہلے دفن کیے گئے تابوتوں کی دریافت
،تصویر کا ذریعہEPA
مصر میں آثارِ قدیمہ نے ایک قدیمی قبرستان سے 27 تابوت دریافت کیے ہیں جنہیں ڈھائی ہزار سال قبل دفنایا گیا تھا۔
یہ تابوت دارالحکومت قاہرہ کے جنوب میں علاقے سقارہ میں واقع ایک مقدس مقام پر ایک کنویں کے اندر پائے گئے ہیں۔
حکام کا کہنا ہے کہ اس ماہ کے شروع میں تیرہ تابوت دریافت ہوئے تھے اس کے بعد مزید 14 تابوت نکالے گئے۔
ماہرین اسے اپنی نوعیت کی سب سے بڑی دریافت کہہ رہے ہیں۔
یہ بھی پڑھیے
End of سب سے زیادہ پڑھی جانے والی
آثارِ قدیمہ کی جانب سے جاری کردہ تصاویر میں دیکھا جا سکتا ہے کہ لکڑی کے تابوت اور دیگر چھوٹے نوادرات کو مختلف رنگوں میں پینٹ کیا گیا۔
،تصویر کا ذریعہEPA
سقارہ 3،000 سال سے زیادہ عرصہ تک تدفین کا ایک اہم مقام تھا اور یہ یونیسکو کا نامزد ورلڈ ہیریٹیج سائٹ ہے۔
مصر کی وزارت برائے نوادرات نے ہفتے کے روز ایک بیان میں کہا کہ 'ابتدائی مطالعے سے پتہ چلتا ہے کہ یہ تابوت مکمل طور پر بند ہیں اور انھیں دفن کرنے کے بعد سے کھولا نہیں گیا۔‘
’مزید راز‘
بیان میں مزید کہا گیا ہے کہ مصر کے نوادرات کے وزیر خالد الاعنانی نے ابتدا میں اس دریافت کا اعلان اس وقت تک موخر رکھا جب تک انھوں نے خود اس سائٹ کا دورہ نہیں کیا جہاں انھوں نے عملے کا شکریہ ادا کیا جنہوں نے گیارہ میٹر (36 فٹ) نیچے جا کر مشکل حالات میں بھی اچھی طرح کام کیا۔
،تصویر کا ذریعہEgyptian Ministry of Tourism and Antiquities
اس مقام پر کھدائی کا کام جاری ہے کیونکہ ماہرین تابوتوں کے بارے میں مزید تفصیلات جاننے کی کوشش کررہے ہیں۔
وزارت نے کہا کہ امید ہے کہ آنے والے دنوں میں ایک پریس کانفرنس میں 'مزید راز' افشا ں کیے جائیں گے۔
لکڑی کے تابوت کے آس پاس دریافت ہونے والی دیگر نوادرات بھی اچھی ساخت کی ہیں اور رنگین انداز میں سجائی گئی ہیں۔
،تصویر کا ذریعہEPA
نومبر 2018 سقارہ میں پیرامڈ کے قریب دریافت کے بعد آثار قدیمہ کے ماہرین نے ممی کیے ہوئے جانوروں کا ایک بڑا ذخیرہ پہلی بار عوام کے سامنے پیش کیا تھا
اس دریافت میں ممی شدہ بلیاں، مگرمچھ، کوبرا اور پرندے شامل تھے۔
،تصویر کا ذریعہEgyptian Ministry of Tourism and Antiquities
،تصویر کا ذریعہEPA
سقارہ ، قاہرہ سے تقریبا30 کلومیٹر(18 میل) جنوب میں واقع ہے اور ایک قدیم تدفین گاہ ہے جو قدیم مصر کے دارالحکومت میمفس کے لیے قبرستان کے طور پر دو ہزار سال سے زیادہ عرصہ تک استعمال کیا جاتا رہا۔
حالیہ برسوں میں مصر نے اپنی سیاحت کی صنعت کو دوبارہ زندہ کرنے کے لیے اپنے آثار قدیمہ کی جانب سے ہونے والی دریافتوں کی تشہیر میں اضافہ کر دیا ہے۔
