اگ نوبل انعام: سائنس کے عجیب و غریب تجربات کو سراہنے کے لیے قائم کیے گئے ایوارڈز کے 30ویں سال میں امن کا ’مزاحیہ نوبل‘ انڈیا اور پاکستان کے نام

کیا آپ کو معلوم ہے کہ اس سال امن کا ’اگ نوبل انعام‘ انڈیا اور پاکستان کی حکومتوں کو دیا گیا ہے کیونکہ ان کے سفارت کار آدھی رات کو ایک دوسرے کی گھنٹیاں بجا کر دروازہ کھلنے سے پہلے ہی بھاگ جاتے تھے۔

سنہ 2018 میں برطانوی اخبار گارڈئین کی ایک رپورٹ کے مطابق اسلام آباد نے دہلی میں اپنے ہائی کمشنر کو اس وقت مشاورت کے لیے وطن واپس بلا لیا تھا جب دونوں ممالک کے سفارتی عملے نے ایک دوسرے پر ہراسانی کے الزامات لگائے۔

ہراسانی کے ان الزامات میں ہائی کمیشن کے دفتر کی کاروں کا پیچھا کرنا، پانی اور بجلی کے پائپ اور تاریں کاٹنا حتٰی کے رات کے تین بجے سینیئر سفارت کاروں کے گھروں کی گھنٹیاں بجا کر بھاگ جانا بھی شامل تھا۔

گھنٹی بجانے والے کیس میں شکایت اسلام آباد میں انڈیا کے ڈپٹی ہائی کمشنر جے پی سنگھ کی طرف سے سامنے آئی تھی جبکہ دہلی میں ان کے ہم منصب نے بھی ایسی ہی شکایت کی تھی۔

یہ تو ہو گیا گھنٹیاں بجا کر بھاگنے کا معاملہ، مگر کیا آپ نے اُس مگرمچھ کے بارے میں سُنا ہے جس نے ایک پارٹی کے دوران ہیلیئم گیس میں سانس لے کر مضحکہ خیز آواز میں بات کرنا شروع کر دی؟

یہ بھی پڑھیے

گولڈن گلوب 2020 ایوارڈز میں کون کون جیتا؟

جانوروں کی مزاحیہ تصاویر کے مقابلے کے فائنلسٹس

’طاقتور کے سامنے سچ بولنے والے‘ حسن منہاج کا شو بند

یہ کوئی لطیفہ نہیں بلکہ سٹیفن ریبر اور ان کے ساتھیوں کا ایک سنجیدہ تجربہ تھا جس میں انھوں نے یہ جاننے کی کوشش کی کہ مگرمچھ آپس میں رابطہ کیسے کرتے ہیں۔

اگرچہ یہ سنجیدہ تحقیق تھی لیکن اس کے مزاحیہ پہلوؤں کے باعث ٹیم سٹیفن اور ان کی ٹیم کو اگ نوبل انعام سے نوازا گیا۔

اسی طرح کے دس ایوارڈز کا جمعرات کو مزاحیہ سائنسی جریدے ’اینلز آف امپروبِبل ریسرچ‘ میں اعلان کیا گیا۔

سنہ 2020 کے دوسری فاتحین میں وہ ٹیم بھی شامل تھی جنھوں نے خود پسند افراد کی شناخت کے لیے ایک طریقہ وضع کیا تھا، ایک اور گروہ ایسا بھی ہے جو یہ دیکھنا چاہتے تھے کہ جب زمینی کیڑوں کو تیزی سے ہلایا جائے تو کیا ہوتا ہے۔

یہ سب سطحی طور پر محض بےوقوفی کی باتیں لگتی ہیں، لیکن اگر غور سے مشاہدہ کریں تو احساس ہوتا ہے کہ اگ نوبل انعامات کے ذریعے سامنے لائی جانے والی زیادہ تر تحقیقات کا مقصد حقیقی زندگی کے مسائل سے نمٹنا ہے اور یہ مستند جرائد اور علمی رسالوں میں شائع بھی ہوتی ہیں۔

ڈاکٹر رابرٹ نے بی بی سی نیوز کو بتایا کہ اگ ایوارڈ حاصل کرنے سے ان کی عزت افزائی ہو گی۔

تحقیق میں یہ ظاہر کرنے کی کوشش کی گئی تھی کہ مگرمچھ اور دوسرے رینگنے والے جانور اپنی آواز کے ذریعے اپنے جسم کے حجم کی نمائش کیسے کر سکتے ہیں، جو عمل اکثر ممالیا جانور اور پرندے اپنی آواز کے ذریعے کرتے ہیں۔

’اگر آپ بڑے سائز میں ہیں تو آپ کی آواز والی نالی میں گونج کم ہو جاتی ہے کیونکہ یہ ایک بہت بڑی جگہ ہے جس میں ہوا وائبریٹ سکتی ہے۔ ہمیں معلوم نہیں تھا کہ حقیقت میں رینگنے والے جانور گونج نہیں رکھتے۔ مثال کے طور پر مینڈک، ایمفیبین (خشکی اور تری دونوں پر رہنے والا جانور)وغیرہ۔ لہذا اس تصور کے لے ہمیں ثبوت کی ضرورت ہے کہ درحقیقت مگرمچھوں بھی گونج رکھتے ہیں۔‘

اس تجربے کے لیے ایک ٹینک میں مگرمچھ کو ڈالا گیا تھا جسے باری باری عام ہوا، آکسیجن اور ہیلیئم فراہم کی جاتی۔ ہر بار آواز کے ٹشوز کی وائبریشن تبدیل نہیں ہوتی ہے لیکن جانوروں کی آوازیں تبدیل ہو جاتی ہیں کیونکہ گیس کے مختلف مرکب میں آواز کی رفتار مختلف ہوتی ہے۔

اگ نوبل انعام کیا ہیں؟

یہ 30واں سال ہے جب اگ نوبل انعام پیش کیے گئے ہیں۔

ان انعامات کا مرکز امریکہ کی ہاورڈ یونیورسٹی کا سینڈرز تھیٹر ہے اور یہ تقریب ہمیشہ خاصی ہنگامہ خیز ہوتی ہے۔ اکثر ایک چھوٹی سی لڑکی بھی شامل ہوتی ہے جو کسی بھی ایسے شخص کو ’بورنگ‘ کی آوازیں لگاتی ہے جبکہ ہال میں زیادہ تر لوگ کاغذ کے ہوائی جہاز اڑا رہے ہوتے ہیں۔

لیکن کووڈ 19 کی وبا کے باعث یہ تقریب بھی آن لائن منتقل ہو گئی۔

تاہم کچھ روایات کو برقرار رکھا گیا ہے، جیسے اصلی نوبل انعام یافتہ افراد کی شمولیت۔ ڈاکٹر ریبر کی ٹیم کو برطانیہ میں مقیم محقق آنڈرے گائم نے اگ نوبل انعام پیش کیا۔ ڈاکٹر آندرے نے گرافین پر اپنے کام کے لیے 2010 میں فزکس کا نوبل جیتا تھا۔

پروفیسر گائم کو خود بھی مینڈکوں کی چھلانگوں پر تحقیق کرنے کے لیے اگ نوبل انعام مل چکا ہے۔

سنہ 2020 میں اگ نوبل انعامات جیتنے والوں کی مکمل فہرست یہ ہے۔ ہر جیتنے والی ٹیم کو 10 کھرب ڈالر کا نقد انعام دیا جاتا ہے، تاہم یہ 10 کھرب زمبابوے کی کرنسی میں ادا ہوتے ہیں!