وعدہ کریں کہ آپ ہماری قدر کریں گے، ہمارے گھر کو بچائیں گے: شیر کا ٹویٹ

انڈیا نے 'گلوبل ٹائیگر ڈے' یا 'انٹرنیشنل ٹائيگر ڈے' کے موقعے پر شیروں کو تحفظ فراہم کرنے کا عہد کیا ہے۔

سائنس اینڈ ٹکنالوجی، ماحولیات، جنگلات اور موسمیاتی تبدیلی کے وزیر ڈاکٹر ہرش وردھن نے شیروں کے متعلق بیداری پیدا کرنے کے لیے منعقدہ ایک پروگرام میں شیروں کو بچانے کا عہد کیا۔

٭ سیلفی لیتے سائبیرین شیر

٭ انڈیا میں شیروں کی ہلاکتوں پر ’خاموشی‘ کیوں؟

خیال رہے کہ دنیا بھر میں ٹائیگر کہے جانے والے شیروں کی 70 فیصد آبادی ہندوستان کی تقریبا 50 مختلف جنگلی پناہ گاہوں میں رہتی ہے۔

سنہ 2010 میں سینٹ پیٹرسبرگ میں منعقدہ کانفرنس میں 29 جولائی کو 'بین الاقوامی ٹائيگرز ڈے' کے طور پر منانے کا فیصلہ کیا گیا تھا جس کا مقصد اس کی قدرتی رہائش کو تحفظ فراہم کرنا اور لوگوں میں اس کے متعلق بیداری پیدا کرنا تھا۔

سنیچر بنگلہ دیش، نیپال، انڈیا، برطانیہ اور امریکہ سمیت دنیا بھر میں 'گلوبل ٹائيگر ڈے' کے سلسلے میں تقریبات منعقد ہوئيں۔

ورلڈ وائڈ فنڈ اپنے 'ڈبل دا ٹائيگر' پروجیکٹ یعنی شیروں کی تعداد دگنی کرنے پر کام کر رہا ہے اور ہندوستان اس پروجیکٹ میں شامل ہے۔

اتوار کو انڈیا کی سوشل میڈیا کے ٹاپ ٹرینڈز میں 'انٹرنیشنل ٹائیگر ڈے' سرفہرست ہے اور لوگ اس جانور کے بارے میں اپنی رائے پیش کر رہے ہیں۔

انڈیا میں سکولی بچوں نے شیر کو بچانے کے لیے سکٹ پیش کیں اور شیر کے ماسک پہنے نظر آئے۔

جبکہ انڈیا میں ریت سے مجسمہ بنانے والے معروف فنکار سدرشن پٹنایک نے اس موقعے پر شیر کی جو تصویر بنائی اسے سوشل میڈیا پر کافی سراہا جا رہا ہے۔

آلو آشیش نامی ہینڈل سے ایک صارف نے لکھا: 'شیر خوبصورتی، قوت اور قومیت کی علامت ہے اس لیے اسے بچائیں۔ خیال رہے کہ ٹائیگر انڈیا اور بنگلہ دیش کا قومی جانور ہے۔'

جنوبی ہندوستانی ریاست کیرالہ کی وزارت سیاحت نے شیر کی جانب سے ایک ٹویٹ کیا ہے جس میں لکھا ہے کہ 'اس بین الاقوامی یوم ٹائیگر پر وعدہ کریں کہ آپ ہماری قدر کریں گے اور ہمارے گھر کو بچائیں گے۔'