ہلاک ہونے والے کینڈین فوجیوں کی تعداد سو تک پہنچ گئی ہے

افغانستان میں کینیڈا کے اعلی ترین فوجی کمانڈر بریگیڈیر جنرل ڈینس تھامسن نے افغانستان میں اپنے ملک کی فوج کا دفاع کرتے ہوئے کہا کہ وہ یہاں ’امن اور استحکام‘ لا رہے ہیں۔

انہوں نے کہا کہ ’ان بہادر فوجیوں کی قربانیاں ہمیشہ ہماری نظر میں رہنا چاہیئں۔‘

طالبان مخالف نیٹو اتحاد میں شامل اس وقت کینیڈا کے ڈھائی ہزار فوج افغانستان میں موجود ہیں۔

افغانستان میں کینیڈا کے ایک سفیر بھی ہلاک ہو گئے تھے۔

ہلاک ہونے والے فوجیوں کی گاڑی سڑک کےکنارے نصب کیے گئے ایک خودکار بم سے ٹکرا گئی تھی۔

اس سے قبل افغانستان کے شہر خوست میں خفیہ ایجنسی کے دفتر کے اندر خودکش حملہ ہوا تھا۔

خبر رساں ایجنسی رائٹرز کے مطابق حکام کا کہنا ہے کہ خودکش حملے کے بعد عمارت کے اندر فائرنگ شروع ہو گئی۔ حکام کا کہنا ہے کہ اس واقعے میں کم از کم دو افراد ہلاک ہو گئے۔

اس واقعے کے بعد افغان اور امریکی فوجوں نے علاقے کا محاصرہ کر لیا ہے اور عینی شاہدین کے مطابق ایک ہیلی کاپٹر بھی عمارت کے قریب اڑتا دیکھا گیا ہے۔

واضح رہے کہ افغانستان میں طالبان کی کارروائیوں میں تیزی آئی ہے۔ ستائیس نومبر کو کابل میں امریکی سفارتخانے کے قریب دھماکہ ہوا تھا۔