سارہ پیلن الاسکا نیشنل گارڈز کی بھی سربراہ ہیں

چوالیس سالہ سارہ 2006 میں الاسکا کی گورنر منتخب ہوئی تھیں اور انہیں گورنری کے دو سالہ دور میں اصلاحات متعارف کروانے کے حوالے سے جانا جاتا ہے۔

سنہ 2008 کے صدارتی انتخاب کی دوڑ میں انہیں بطور اپنی نائب کے متعارف کرواتے ہوئے ریپبلکن صدارتی امیدوار جان میکین نے کہا کہ سارہ ایک بااصول اور رحمدل خاتون ہیں جن میں مشکلات کا مقابلہ کرنے کی صلاحیت بدرجہ اتم موجود ہے۔

الاسکا کی گورنر منتخب ہونے سے قبل سارہ وسیلا نامی شہر کی کونسل ممبر اور 1996 سے 2002 تک اسی شہر کی میئر رہ چکی ہیں۔ 1987 میں اداہو یونیورسٹی سے صحافت اور سیاسیات میں ڈگری حاصل کرنے والی سارہ سیاست میں آنے سے قبل نہ صرف ٹیلیویژن پر کھیلوں کی خبریں پڑھتی رہی ہیں بلکہ وہ اپنے آبائی شہر میں ہونے والے مقابلۂ حسن کی فاتح بھی ہیں۔

یہ کہا جا رہا ہے کہ خاتون امیدوار ہونے کی بناء پر سارہ پیلن کا انتخاب جان میکین کی انتخابی مہم کو تقویت بخشے گا اور وہ ان ڈیموکریٹ ووٹرز کو اپنی جانب متوجہ کرنے میں کامیاب رہیں گی جو کہ ہلیری کلنٹن کے صدارتی امیدوار کی دوڑ سے باہر ہونے سے دلبرداشتہ ہو گئے ہیں۔

سارہ پیلن کو ان کے مضبوط سماجی اور قدرے قدامت پسند رویے کی وجہ سے بھی پہچانا جاتا ہے۔وہ اسقاطِ حمل کی مخالف کے طور پر جانی جاتی ہیں جس کی ایک مثال وہ خود ہیں جب انہوں نے اپنے پانچویں بچے کی پیدائش سے قبل یہ جاننے کے باوجود اسقاط کروانے سے انکار کر دیا تھا کہ ان کا بچہ ’ڈاؤنز سنڈروم‘ کا شکار ہے‘۔

وہ اپنے آپ کو ایک عام امریکی خاتون کے طور پر ووٹرز کے سامنے پیش کرنے میں بھی کامیاب رہی ہیں۔ریپبلکنز کی جانب سے نامزدگی کے موقع پر بھی سارہ نے کہا کہ وہ سیاست کے میدان میں آنے سے قبل ’الاسکا کی ایک عام سی ماں‘ تھیں۔

	جان میکین کی نیابت کے لیے سارہ کا انتخاب غیر متوقع تھا

خود سارہ کے بقول نائب صدارت کے لیے نامزدگی ان کے لیے غیر متوقع خبر رہی تاہم ان کا کہنا ہے کہ ان کا تمام کیریئر کو ایک ہی خواہش سے مہمیز ملتی رہی ہے اور وہ ہے’ سب سے پہلے عوام‘۔

الاسکا کی گورنر کی حیثیت سے بھی سارہ نے کئی نسلی اصلاحات متعارف کروائیں اور ان کا کہنا ہے کہ وہ صحیح اور عوام کے لیے مفید عمل کی خاطر سیاسی خطرات کا سامنا کرنے کو بھی تیار رہیں۔

انہیں الاسکا میں رشوت ستانی سے نمٹنے کے لیے بھی جانا جاتا ہے اور اس کی ایک بڑی مثال 2003 میں سارہ کا بطور ممبر الاسکا تیل و گیس کمیشن ریاست ریپبلکنز کے اعمال کی تحقیقات کروانا ہے۔ تاہم اس وقت خود بھی ایک سٹیٹ پبلک سیفٹی کمشنر کی برخاستگی پر ان کے خلاف ایک انکوائری چل رہی ہے۔

سارہ پیلن الاسکا نیشنل گارڈز کی بھی سربراہ ہیں اور جان میکین کے مطابق یہ اس بات کا مظہر ہے کہ ’وہ جانتی ہیں کہ ہماری قوم کی رہنمائی کے لیے کیا چیز درکار ہے‘۔تاہم اس سب کے باوجود ناقدین کا کہنا ہے کہ قومی اور عالمی سطح کے تجربے کی کمی کی وجہ سے سارہ نائب صدارت کے لیے ایک موزوں امیدوار نہیں ہیں۔