 | | | باراک اوبامہ اور بائڈن کی یہ پہلی مشترکہ ریلی تھی |
امریکی عہدۂ صدارت کے لیے ڈیموکریٹک پارٹی کے امیدوار باراک اوبامہ کی جانب سے امریکہ کے نائب صدر کے لیے سینئر امریکی سینیٹر جوزف بائڈن کی نامزدگی کے بعد دونوں رہنماؤں نے ایک ساتھ پہلی مرتبہ ریاست الینوائے میں ایک انتخابی ریلی میں شرکت کی ہے۔ سپرنگ فیلڈ میں ہونے والی اس ریلی میں اوبامہ نے بائڈن کا تعارف یہ کہہ کر کروایا کہ وہ’شاندار ریکارڈ کے حامل، بنیادی طور پر ایک مہذب شخصیت ہیں‘۔ بارک اوبامہ نے نائب صدر کے عہدے کے لیے جوزف بائڈن کے انتخاب کی تقدیق سنیچر کی شام کی تھی۔سینیٹر بائڈن کے نام کے اعلان سے قبل ہی امریکی میڈیا میں ایسی خبریں چھپنے لگی تھیں کہ انہیں نائب صدر کے عہدے کے امیدوار کے طور پر منتخب کر لیا گیا ہے۔ باراک اوبامہ کے فیصلے کا اعلان ان کی ویب سائٹ پر کیا گیا۔مسٹر اوبامہ کی انتخابی مہم سے متعلق ویب سائٹ پر کہا گیا ہے کہ جوزف بائڈن کے پاس خارجہ پالیسی کا شاندار تجربہ ہے اور وہ مختلف پارٹی کے ممبران کو ایک موضوع پر متفق کرنے کی صلاحیت رکھتے ہیں۔ یاد رہے کہ ڈیموکریٹ پارٹی کا کنونشن آئندہ ہفتے منعقد ہو رہا ہے۔ 65 سالہ جوزف بائڈن کو سینیٹ کا تیس سالہ تجربہ ہے اور خارجہ پالیسی کے معاملات میں ان کے تجربے کی وجہ سے بھی انہیں بہت عزت کی نگاہ سے دیکھا جاتا ہے۔ جوزف بائڈن سن 1942 میں امریکی ریاست پنسِلوینیا کے شہر سکرینٹن کے ایک آئرش کیتھولِک خاندان میں پیدا ہوئے۔ بعد میں یہ خاندان ریاست ڈیلاویئر منتقل ہوگیا۔ سینیٹر بائڈن انتیس سال کی عمر میں ہی پہلی بار امریکی سینیٹ کے لیے منتخب ہوئے تھے اور انہوں نے سنہ 1972 سے ریاست ڈیلاویئر کی امریکی سینیٹ میں نمائندگی کی ہے۔ جوزف بائڈن امریکہ کے مزدور طبقے سے تعلق رکھتے ہیں اور امید کی جارہی ہے کہ وہ سفید فام مزدور طبقے کے ووٹروں کو اوبامہ کی جانب راغب کرنے میں کامیاب ہونگے۔ پارٹی انتخابات کے دوران سفید فام مزدور طبقے کے ان ووٹروں نے اوبامہ کے خلاف ہیلری کلِنٹن کو ووٹ دیا تھا۔ ریپبلیکن کے صدارتی امیدوار جان مکین اگلے ہفتے اپنی پارٹی کے امیدوار کا اعلان کر سکتے ہیں۔ ایسی قیاس آرائیاں کی جا رہی ہیں کہ مکین 29 اگست کو اپنے امیدوار کا اعلان کریں گے۔ اس دن ان کی بہتّرویں سالگرہ ہے اور اسی دن ڈیمو کریٹک پارٹی کا کنونشن بھی ختم ہو رہا ہے۔ | 
اوبامہ نے جو بائڈن کا انتخاب کیا
