رچرڈ لسٹر بی بی سی نیوز، واشنگٹن

	مسٹر بائڈن کو خارجہ پالیسی اور قومی سلامتی کا خاصا تجربہ ہے

مسٹر اوبامہ کے اس فیصلے کا اعلان ان کی ویب سائٹ پر کیا گیا ہے ۔ اگلے ہفتے ان کی پارٹی کا کنونشن ہے۔

65 سالہ سینیٹر جوزف بائڈن کو سینیٹ کا تیس سال کا تجربہ ہے اور خارجہ پالیسی کے معاملات میں ان کے تجربے کی وجہ سے بھی انہیں بہت عزت کی نگاہ سے دیکھا جاتا ہے۔

جوزف بائڈن سن 1942 میں امریکی ریاست پین سِلوینیا کے شہر اسکرینٹن کے ایک آئرش کیتھولِک خاندان میں پیدا ہوئے۔ بعد میں یہ خاندان ریاست ڈیلاویئر منتقل ہوگیا۔ سینیٹر بائڈن انتیس سال کی عمر میں ہی پہلی بار امریکی سینیٹ کے لیے منتخب ہوئے تھے۔ انہوں نے سن 1972 سے ریاست ڈیلاویئر کی امریکی سینیٹ میں نمائندگی کی ہے۔

جوزف بائڈن امریکہ کے مزدور طبقے سے تعلق رکھتے ہیں اور امید کی جارہی ہے کہ وہ سفید فام مزدور طبقے کے ووٹروں کو اوبامہ کی جانب راغب کرنے میں کامیاب ہونگے۔ پارٹی انتخابات کے دوران سفید فام مزدور طبقے کے ان ووٹروں نے اوبامہ کے خلاف ہیلری کلِنٹن کو ووٹ دیا تھا۔

ریپبلیکن کے صدارتی امیدوار جان مکین اگلے ہفتے اپنی پارٹی کے امیدوار کا اعلان کر سکتے ہیں۔ ایسی قیاس آرائیاں کی جا رہی ہیں کہ مسٹر مکین 29 اگست کو اپنے امیدوار کا اعلان کریں گے۔ اس دن ان کی 72 ویں سالگرہ ہے اور اسی دن ڈیمو کریٹک پارٹی کا کنونشن بھی ختم ہو رہا ہے۔

سینیٹر بائڈن کے نام کے اعلان سے قبل ہی امریکی میڈیا میں ایسی خبریں چھپنے لگی تھیں کہ انہیں نائب صدر کے عہدے کے امیدوار کے طور پر منتخب کر لیا گیا ہے۔

مسٹر اوبامہ کی انتخابی مہم سے متعلق ویب سائٹ پر کہا گیا ہے کہ جوزف بائڈن کے پاس خارجہ پالیسی کا شاندار تجربہ ہے اور وہ مختلف پارٹی کے ممبران کو ایک موضوع پر متفق کرنے کی صلاحیت رکھتے ہیں۔

توقع ہے کہ مسٹر اوبامہ اور مسٹر بائڈن آج شام پارٹی کی ریلی میں ایک ساتھ نظر آئیں گے۔