خدشہ ظاہر کیا جا رہا ہے کہ بیچوان کا علاقہ سب سے زیادہ متاثر ہوا ہے

چین میں زلزلے سے ہلاکتیں

صوبے سیچوان کے علاقے دوجیانگ یان میں پرائمری سکول کی منہدم عمارت کے ملبے سے پچاس طلبہ کی لاشیں نکالی جا چکی ہیں جبکہ اطلاعات کے مطابق اس ملبے میں نو سو طلبہ دبے ہوئے ہیں۔

سِنہوا کے مطابق صوبے سیچوان کے ساتھ مواصلاتی نظام کٹ گیا ہے۔ چین کے صدر ہو جینتاؤ نے حکم دیا ہے کہ متاثر افراد کی مدد کے لیے تمام تر کوششیں کی جائیں۔

خدشہ ظاہر کیا جا رہا ہے کہ بیچوان کا علاقہ سب سے زیادہ متاثر ہوا ہے جہاں پر اسی فیصد عمارتیں منہدم ہو گئی ہیں اور ان میں تین سے پانچ ہزار افراد کی ہلاکت کا خدشہ ہے اور تقریباً دس ہزار افراد کے زخمی ہونے کی اطلاعات ہیں۔

امریکی محکمہ ارضیات نے اپنی ویب سائٹ پر لکھا ہے کہ زلزلے کا مرکز سیچوان صوبے کے شہر چینگڈو سے بانوے کلو میٹر دور شمال مغرب میں تھا۔ اس صوبے کی آبادی تقریباً دس ملین ہے۔ زلزلےکے بعد علاقے میں ٹیلی فون کا نظام ٹھپ ہو گیا ہے۔

اطلاعات کے مطابق صوبے سیچوان کے علاقے دوجیانگ یان میں پرائمری سکول کی عمارت منہدم ہونے کے باعث نو سو طلبہ ملبے تلے دب گئے۔ دوجیانگ یانگ زلزلے کے مرکز سے سو کلومیٹر دور واقع ہے۔

چینی خبر رساں ایجنسی ژِنہوا کے مطابق پرائمری اسکول کی منہدم عمارت کے ملبے سے کچھ طلبہ نکلنے کی کوشش کر رہے ہیں جب کہ کچھ مدد کے لیے پکار رہے ہیں۔

	پرائمری سکول کی عمارت کے ملبے سے طلبہ کو نکالنے کی کوشش کی جا رہی ہے

زلزلے کے مرکز کے قریب واقع دوجیانگ یان شہر میں گھروں کے منہدم ہونے کی اطلاعات ہیں جن میں دس افراد کے زخمی ہونے کی اطلاع ہے۔

چینگڈو کی عمارتوں میں شگاف پڑ گئے اور پانی کے پائپ پھٹ گئے اور علاقے کے لوگ سڑکوں پر نکل آئے۔

ژِنہوا کے مطابق زلزلے کے چوالیس جھٹکے محسوس کیے جا چکے ہیں۔

خدشہ ظاہر کیا جا رہا ہے کہ بیچوان کا علاقہ سب سے زیادہ متاثر ہوا ہے جہاں پر اسی فیصد عمارتیں منہدم ہو گئی ہیں اور ان میں تین سے پانچ ہزار افراد کی ہلاکت کا خدشہ ہے اور تقریباً دس ہزار افراد زخمی ہونے کی اطلاعات ہیں

انہوں نے کہا کہ متاثرہ علاقوں سے خبریں بہت تیزی سے آ رہی ہیں اور یہ پہلی بار ہے کہ چینی سرکاری میڈیا اتنی تندہی سے کام کر رہی ہے۔