پال رینالڈز بی بی سی ورلڈ افیرز

	امریکہ نے پاکستانی فوج کے ساتھ تعاون رکھنے کا اعادہ کیا ہے

دونوں ممالک نے پاکستان میں ایمرجنسی کے نفاذ کی مذمت کی ہے لیکن سوال یہ پیدا ہوتا ہے کہ کیا ان ممالک کوانہی حالات سے سمجھوتہ کرنا پڑے گا۔

امریکہ اور برطانیہ کی طرف سے پاکستان کے فوجی حکمران جنرل پرویز مشرف اور پیپلز پارٹی کے درمیان سمجھوتہ کرانے کی کوششوں کو سخت دھچکا لگا ہے اور شاید اب یہ کوششیں کامیاب ہی نہ ہو سکیں۔

امریکہ اور برطانیہ کے لیے سب سے بڑی الجھن یہ ہے کہ وہ ایمرجنسی کے نفاذ کی مذمت کرنے کے باوجود کس طرح جنرل مشرف کے ساتھ اسی طرح تعاون کرتے رہیں جس طرح وہ ایمرجنسی کے نفاذ سے پہلے کر رہے تھے۔

امریکہ اور برطانیہ کے وزرائے خارجہ نے جنرل مشرف کے ایمرجنسی کے اقدم پر اپنے رد عمل میں یہ نہیں کہا کہ وہ ان کے ساتھ روابط ختم کر دیں گے بلکہ انہوں نے جنرل مشرف کو آئینی راستے پر واپس آنے کا مشورہ دیا ہے۔

امریکی وزیر خارجہ کانڈو لیزا رائس نے کہا ہے کہ یہ پاکستان کے مفاد میں ہے کہ وہ فوراٌ آئینی راستے پر واپس آ جائے اور وقت پر انتخابات کی یقین دہانی کرائی جانی چاہیے۔

برطانوی وزیر خارجہ ملی بینڈ نے بھی اسی طرح کے خیالات کا اظہار کرتے ہوئے کہ پاکستان کی حکومت کو آئین کی پاسداری کرنی چاہیے اور وعدے کے مطابق انتخابات کا انعقاد کرنا چاہیے۔

مشرف وعدہ پورا کرے  ایمرجنسی کے نفاذ پر تبصرہ کرتے ہوئے امریکی وائٹ ہاؤس کے ترجمان نے جنرل پرویز کو وردی اتارنے کے اپنے وعدہ کو پورا کرنے کا کہا ہے۔ وائٹ ہاؤس ترجمان

امریکہ اور برطانیہ پاکستان میں ایمرجنسی کے نفاذ کے باوجود دہشتگردی کے خلاف جنگ میں جنرل مشرف کے تعاون کے خواہاں ہوں گے۔

مغربی ممالک پاکستانی فوج کی شدت پسندوں کے ساتھ لڑائی میں پسپائی پر پریشان ہیں۔ حال میں جنوبی وزیرستان میں پاکستانی فوج کے تین سو سپاہیوں نے قبائلی شدت پسندوں کے سامنے ہتھیار ڈال دیئے تھے۔

لیکن ان سب حقائق کے باوجود امریکہ پاکستان کی فوج کو تنہا کرنے کا متحمل نہیں ہو سکتا اور اسی لیے اس نے ایمرجنسی کے نفاذ کی مذمت کرنے کے ساتھ کہا ہے کہ پاکستانی فوج کو امداد جاری رہے گی۔

پینٹاگان کے پریس سیکرٹری نے پاکستان میں ایمرجنسی کے نفاذ پر تبصرہ کرتے ہوئے کہا ہے کہ اس سے پاکستان اور امریکہ کے درمیان فوجی تعاون پر کوئی اثر نہیں پڑے گا۔