کارروائی میں ایک عورت، تین بچے اور تین مزاحمت کار زخمی بھی ہوئے

فوج کی جانب سے جاری کردہ بیان کے مطابق یہ آپریشن ثرثار کے علاقے میں القاعدہ کے سینئر رہنماؤں کی موجودگی کی اطلاع پر کیا گیا۔

بیان کے مطابق ابتدائی فضائی حملے میں چار مزاحمت کار مارے گئے جس کے بعد زمینی فوج کی حفاظت کے لیے بھی مزید فضائی حملے کیے گئے جن سے پندرہ مزاحمت کاروں کے علاوہ چھ عورتیں اور نو بچے بھی مارے گئے۔

فوج کے مطابق ابتدائی حملے کے بعد مشتبہ افراد کو ثرثار جھیل کے جنوب کی جانب فرار ہوتے دیکھا گیا جس پر زمینی فوج نے کارروائی کی اور فضائیہ نے ان کی مدد کی۔ بیان میں یہ بھی کہا گیا ہے کہ اس کارروائی میں ایک عورت، تین بچے اور تین مزاحمت کار زخمی بھی ہوئے ہیں۔

عراق میں کثیر الملکی فوج کے میجر بریڈ لیٹن کا کہنا ہے کہ’ ہمیں افسوس ہے کہ عراق کو دہشتگردی سے پاک کرنے کے حوالے سے ہونے والی اس کارروائی میں عام شہری بھی ہلاک یا زخمی ہوئے‘۔ ان کا یہ بھی کہنا تھا کہ’دہشتگرد جان بوجھ کر معصوم بچوں اور عورتوں کی جانیں خطرے میں ڈالتے ہیں‘۔