مغربی سفارتکار الزام لگاتے ہیں کہ ایران عالمی پابندیوں میں تاخیر کے حربے استعمال کر رہا ہے

ادارے کی ایک رپورٹ میں کہا گیا ہے کہ ایران کے جوہری پروگرام کے بارے میں بین الاقوامی شکوک رفع کرنے کے بارے میں جو سمجھوتہ ہوا ہے، وہ ایک مثبت اور معنی خیز اقدام ہے۔

ایران نے کہا ہے کہ آئی اے ای اے کی رپورٹ بتاتی ہے کہ ایران کوئی جوہری بم بنانے کی کوشش نہیں کر رہا۔عالمی ادارے میں امریکی نمائندے نے کہا کہ اگر ایران کے رہنما واقعی شکوک رفع کرنا چاہتے ہیں تو وہ ان جوہری سرگرمیوں کو روک دیں جو شہری مصارف کے لیے ضروری نہیں۔

دریں اثناء عالمی ادارے نے کہا ہے کہ ایران اس منصوبے پر اتفاق کر گیا ہے جس کے تحت اس کی متنازعہ جوہری سرگرمیوں پر شکوک ہیں۔

عالمی ادارے کے بقول ایران کا اقدام اہم ہے لیکن یہ ضروری ہے کہ ایران مکمل اور بھرپور تعاون کرے۔

مغربی ممالک کہتے ہیں کہ اقوامِ متحدہ کی جانب سے مزید پابندیوں سے بچنے کے لیے ایران کو چاہیے کہ وہ اپنا پروگرام بند کر دے۔

اقوامِ متحدہ کی سکیورٹی کونسل پہلے ہی ایران کے خلاف دو ادوار میں پابندیاں عائد کر چکی ہے۔

عالمی ادارے نے ایک رپورٹ میں جس کی نقل بی بی سی کو ملی ہے کہا ہے کہ ایران کا شکوک رفع کرنے کے لیے تیار ہو جانا ایک اہم پیش رفت ہے۔

آئی اے ای اے کا ایران کے ساتھ اشتراک کا منصوبہ پہلے ہی بعض مغربی سفارتکاروں کی تنقید کا ہدف رہا ہے۔ یہ سفارتکار ایران پر اقوامِ متحدہ کی پابندیوں میں تاخیری کرانے کے حربوں پر کام کرنے اور اس دوران اپنی جوہری صلاحیت بڑھانے کا الزام عائد کرتے ہیں۔