تقریبات میں شرکت کے لیے لاکھوں زائرین کربلا کا رخ کریں گے

امام مہدی کے یومِ پیدائش کی تقریبات منگل اور بدھ کی درمیانی شب اپنے عروج پر ہوں گی۔ توقع ہے کہ اس سلسلے میں لاکھوں شیعہ زائرین کربلا شہر کا رخ کریں گے۔ سکیورٹی خدشات کے پیشِ نظر حکومت نے دو پہیّوں پر چلنے والی گاڑیوں اور ہاتھ گاڑیوں پر پابندی لگا دی ہے۔

بغداد میں پہلے ہی سے رات دس بجے سے صبح پانچ بجے تک روزانہ کرفیو لگا دیا جاتا ہے۔

عراقی فوج کے سربراہ بریگیڈئر جنرل قاسم عطاء نے خبر رساں ادارے اے ایف پی کو بتایا ہے کہ دو پہیّوں والی گاڑیوں اور ہتھ گاڑیوں پر غیر معینہ مدت کے لیے پابندی لگا دی گئی ہے تاہم عام استعمال ہونے والی کاروں پر پابندی نہیں لگائی گئی۔

قبل ازیں شمالی بغداد کے شیعہ اکثریتی علاقے میں ایک کار بم دھماکے میں سات افراد ہلاک ہو گئے ہیں۔

اِسی دوران عراق کے صدر جلال طالبانی، وزیر اعظم نوری المالکی اور دو نائب وزرائے اعظم نے بھی ملاقات کی اس ملاقات میں انہوں نے عراقی کی مخلوط کابینہ میں پیدا ہونے والے حالیہ بحران سے نمٹنے کے لیے مزید بات چیت کی ۔

اِس بحران کی وجہ سے امریکہ کو عراق میں سیاسی پیش رفت کے حوالے سے خاصی تشویش ہے۔ تاہم ابھی تک اس اعلی سطح کے اجلاس کا کوئی نتیجہ سامنے نہیں آیا ہے۔