عراقی ٹیم جنوبی کوریا کو ہرا کر ایشیائی کپ کے فائنل میں پہنچی تھی

حکام کی جانب سے یہ پابندی اس سے قبل ہونے والی ہلاکتوں کو مد نظر رکھتے ہوئے انتہائی سکیورٹی کے سلسلے میں اٹھائے جانے والے اقدامات کا حصہ ہے۔

واضح رہے کہ ایشیاء کپ کے سیمی فائنل میں عراقی فٹبال ٹیم کی فتح کی خوشی کا جشن منانے والوں پر ہوئے بم حملوں میں کم سے کم پچاس افراد ہلاک اور ایک سو پینتیس زخمی ہوگئے تھے۔

تاہم اس مرتبہ حکام نے فٹ بال کے شائقین سے درخواست کی ہے کہ وہ گروپ کی شکل میں باہر سڑکوں پر نکلنے سے گریز کریں۔

شہر میں گاڑیوں کے استعمال پر لگائی گئی پابندی کی تفصیلات بتاتے ہوئے بریگیڈئر جنرل قاسم موساوی کا کہنا تھا کہ اس پابندی کا اطلاق مقامی وقت کے مطابق سہ پہر چار بجے یعنی سعودی عرب اور عراق کی فٹ بال ٹیموں کے درمیان میچ سے قبل ہوگا اور یہ پابندی پیر کی صبح چھ بجے تک برقرار رہے گی۔

واضح رہے کہ عراق کی فٹ بال ٹیم میں سنی اور شیعہ دونوں فرقوں سے تعلق رکھنے والے کھلاڑی شامل ہیں۔ نامہ نگار کا کہنا ہے کہ ٹیم کی کامیابی نے عارضی طور پر ملک کو متحد کردیا ہے۔

یاد رہے کہ ایشیائی کپ کے سیمی فائنل میں عراق کی فٹ بال ٹیم جنوبی کوریا کو ہرا کر فائنل میں پہنچی تھی۔