گورڈن براؤن ٹن ڈاونگ اسٹریٹ میں منتقل ہو گئے ہیں

ملکہ برطانیہ نے گورڈن براؤن کو وزیر اعظم کا عہدہ سنبھالنے کی دعوت بکنگھم پیلس میں ایک گھنٹہ طویل ملاقات کے دوران دی۔ اس ملاقات میں گورڈن براؤن کی اہلیہ سارہ بھی موجود تھیں۔ بکھنگم پیلس میں کچھ دیر قبل ٹونی بلیئر نے وزیر اعظم کی حیثیت سے ملکہ سے آخری ملاقات کی تھی۔

گورڈن براؤن بکنگھم پیلس سے براہراست وزیر اعظم کی سرکاری رہائش گاہ ٹین ڈاونگ اسٹریٹ پہنچے۔ جہاں منتظر ذرائع ابلاغ کے نمائندوں سے مختصر بات چیت کرتے ہوئے انہوں نے کہا کہ وہ ارادہ کے قوی، مقصد کے مستقل مزاج اور عمل طور پر ثابت قدم رہیں گے۔

بدھ کو ٹونی بلیئر نے بحیثیت وزیر اعظم کے آخری مرتبہ برطانوی دارالعوام میں سوالات کا جواب دیئے اور عراق اور افغانستان میں برطانوی فوجیوں کی موجودگی کا دفاع کرتے ہوئے کہا کہ وہ وہاں عام شہریوں کو تحفظ فراہم کر رہے ہیں۔

	گورڈن براؤن نے کہا کہ وہ مستقل مزاج اور ثابت قدم رہیں گے

ٹونی بلیئر نے پارلیمان کے اراکین کو خراج عقدیت پیش کرتے ہوئے کہا کہ گو ایوان میں اکثر تلخیاں بھی پیش آتی ہیں لیکن اس ایوان میں بیشتر اعلیٰ اور عرفع مقاصد کے حصول کی کوششیں کی جاتی ہیں۔

سوال و جواب کے وقفے کے اختتام پر وزیر اعظم ٹونی بلیئر کو ارکان نے کھڑے ہو کر خراج عقیدت پیش کیا جو کہ ارکان کی طرف سے خراج عقیدت پیش کرنے کا غیر معمولی انداز ہے۔

پارلیمنٹ ہاؤس میں اپنی مصروفیات نمٹانے کے بعد ٹونی بلیئر بکھنگم پیلس تشریف لے گئے جہاں انہوں نے ملکہ الزبتھ کو اپنا استعفی پیش کیا۔

ٹونی بلیئر کے بعدملکہ برطانیہ گورڈن براؤن کو ملکہ کی طرف سے باضابطہ طور پر وزیر اعظم کا عہدہ سنبھالنے کی دعوت دی جائے گی۔

گورڈن براؤن کے قریبی ساتھیوں کا کہنا ہے کہ اس کے بعد وہ کابینہ میں ردو بدل کرنے کے ساتھ وزیر خزانہ اور وزیر داخلہ کے عہدوں پر نامزدگیاں بھی کریں گے۔

ٹونی بلیئر نے اگر اقوام متحدہ، یورپی یونین، روس اور امریکہ کی طرف سے مشرق وسطی میں ایلچی کا عہدہ قبول کرلیا تو انہیں پارلیمان کی رکنیت سے مستعفی ہونا پڑے گا۔

گورڈن براؤن کے قریبی ساتھی اور تجارت اور صنعت کے وزیر الیسٹر ڈارلنگ کہ بارے میں کہا جا رہا ہے کہ انہیں وزیر خزانہ کا قلمدان سونپا جائے گا۔

وزیر داخلہ یا ہوم سیکریٹری جان ریڈ نے بھی اپنے عہدے سے علیحدہ ہونے کا عندیہ دیا ہے جس سے کابینہ کی ایک اور اہم نشست خالی ہو جائے گی۔

توقع کی جا رہی ہے کہ جمعرات کو کابینہ کی از سر نو ترتیب دی جائے گی۔

گورڈن براؤن نے جو ٹونی بلیئر کے دس سالہ اقتدار میں وزیر خزانہ کے عہدے پر فائز رہے ہیں کہا ہے کہ وہ باصلاحیت لوگوں کی حکومت تشکیل دیں گے۔

وہ لبرل ڈیموکریٹ کے سابق رہنما لارڈ ایشڈاؤن کو شمالی آئرلینڈ کا وزیر بنانے کی پیش کش کر چکے ہیں لیکن انہوں نے اس پیش کش کو قبول کرنے سے انکار کردیا ہے۔

گورڈن براؤن پہلے ہی تعلیم اور ہاوسنگ کے شعبوں کو اپنی ترجیحات قرار دے چکے ہیں۔