سلیمان بیگ میں ہونے والے حملے میں ہلاک شدگان میں عورتیں اور بچے بھی شامل تھے

ہلاک ہونے والے امریکی فوجیوں میں سے بارہ بغداد میں ہونے والے چار مختلف حملوں میں مارے گئے۔ خبر رساں ایجنسی اے ایف پی کے مطابق ان ہلاکتوں کے ساتھ ماہِ جون میں مرنے والے امریکی فوجیوں کی تعداد انسٹھ تک پہنچ گئی ہے۔

گزشتہ دو دن میں امریکی فوج کو سب سے بڑا جانی نقصان جمعرات کو اس وقت پہنچا جب شمال مشرقی بغداد میں سڑک کنارے نصب بم پھٹنے سے پانچ امریکی فوجی مارے گئے۔ اس دھماکے میں تین عراقی شہری بھی ہلاک ہوئے۔

اس کے علاوہ چار امریکی فوجی بدھ کو مغربی بغداد میں ایک بم حملے میں مارے گئے تھے جبکہ تین علیحدہ علیحدہ واقعات میں پانچ امریکی فوجی ہلاک ہوئے تھے۔

ادھر امریکی فوج کا کہنا ہے کہ بغداد کے شمال میں جاری آپریشن کے دوران دو دن میں درجنوں مزاحمت کار مارے جا چکے ہیں۔ عراق میں امریکی کمانڈر جنرل پیٹرائس کا کہنا ہے کہ اسّی کے قریب القاعدہ رضاکار ہر ماہ شام سے عراق میں داخل ہو رہے ہیں اور ان میں سے زیادہ تر خود کش بمبار ہیں۔