نسیم پر الزام ہے کہ انہوں نے کمپنیوں کے حصہ دار عام شہریوں کے مفاد کے خلاف کام کیا

استغاثہ کا کہنا ہے کہ حافظ محمد زبیر نسیم نے بینکر کی حیثیت سے مختلف سودوں کے بارے میں ملنے والی معلومات کا غلط استعمال کر کے ساڑھے سات ملین ڈالر کا فائدہ حاصل کیا۔

سینتیس سالہ نسیم پر سکیورٹیز فراڈ کے تحت پچیس اور سازش کے تحت ایک الزام عائد کیا گیا۔ ان پر الزام ہے کہ انہوں مختلف ممکنہ معاہدوں کے بارے میں لوگوں کو معلومات فراہم کی تھیں۔ نسیم کے وکیل نے اس معاملے میں تبصرہ کرنے سے انکار کیا۔ ان کے ساتھی ملزمان کو ابھی نامزد نہیں کیا گیا۔

نارتھ ویسٹرن کارپوریشن، انرجی پارٹنرز، ویریٹاز، جیکوزی برانڈ اور دیگر کمپنیوں کا شمار ان اداروں میں ہوتا ہے جن کے معاملات میں نسیم پر الزام عائد کیا گیا ہے۔

نسیم امریکہ میں کریڈٹ سویس سکیوریٹیز میں گلوبل انرجی گروپ کے لیے کام کرتے تھے۔ سرکاری وکیل کا کہنا تھا کہ انٹرنیشنل انرجی گروپ کی رکنیت کی وجہ سے نسیم کو اہم معلومات تک رسائی حاصل تھی۔ نسیم کے ساتھی ملزمان کے نام نہیں بتائے گئے۔