سگولین رویال اور نیکولاس سارکوزی

بدھ کی شام کو نشر ہونے والی اس ٹی وی ڈبیٹ میں نیکولاس سارکوزی اور سگولین رویال نے ماحولیات، معیشت اور قومی سلامتی جیسے موضوعات پر بحث کی۔

یہ بحث متوقع دورانیہ یعنی دوگھنٹے سے زیادہ دیر جاری رہی۔

یہ ٹی وی بحث صدارتی انتخابات کے دوسرے مرحلے سے چار روز پہلے ہوئی ہے۔ اپریل میں اس مقابلے کے پہلے مرحلے میں مسٹر سارکوزی نے ووٹ کا اکتیس عشاریہ دو فیصد حصہ حاصل کیا تھا جبکہ مِز رویال نے پچیس عشاریہ نو فیصد حصہ حاصل کیا تھا۔

خیال ہے کہ ٹی وی پر ہونے والی یہ ڈبیٹ اتوار کے انتخابات میں فیصلہ کن ثابت ہوگی۔

ٹی وی پر ہونے والی اس بحث کو فرانس کے دو بڑے ٹی چینلز نے نشر کیا اور تقریباً بیس ملین لوگوں ن اسے دیکھا۔

ڈبیٹ کے دوران مِز رویال نے امن و عامہ کے حوالے سے مسٹر سارکوزی پر سخت تنقید کی۔ سابق وزیر داخلہ نیکولاس سارکوزی نے اپنے ریکارڈ کا دفاع کرتے ہوئے جواب دیا کے اعداد و شمار سے یہ واضح ہے کہ پر تشدد جرائم میں کمی ہوئی ہے۔

بحث کا سب سے گرما گرم حصہ وہ تھا جس میں دونوں امیدواروں نے سکولوں میں معذور بچوں کے لیے خصوصی انتظامات کے موضوع پر بات کی۔

مسٹر سارکوزی مز روایال کی سوشلسٹ پالسیوں پر تنقید کرتے رہے۔ ان کا کہنا تھا کہ سوشلسٹ جماعت کا متعارف کردہ 35 گھنٹے فی ہفتہ کام کرنے کی پالسی ملک کے لیے تباہ کن ثابت ہوئی ہے۔

فراسن کے سابق صدر ویلری ژِسکارد دیستیں کا کہنا ہے کہ یہ ٹی وی ڈبیٹ الیکشن میں فیصلہ کن ثابت ہوگا۔ تاہم کئی مبصرین اس سے اتفاق نہیں کرتے اور ان کا کہنا ہے کہ اب تک اسی فیصد ووٹر یہ فیصلہ کر چکے ہوتے ہیں کہ وہ کس کو ووٹ دیں گے۔

دونوں امیدوار ان اٹھارہ فیصد ووٹروں کی حمایت جیتنا چاہتے جنہوں پہلے مرحلے میں متعدل امیدوار فرانسوا بیئرو کو ووٹ دیے تھے۔