چوالیس سالہ جونسٹن کو باہر مارچ کو غزہ میں بندوق کی نوک پر اغواء کر لیا گیا تھا

محمود عباس نے سویڈن میں اخباری نمائندوں کو بتایا کہ’ہماری خفیہ ایجنسیوں نے اس بات کی تصدیق کی ہے کہ وہ زندہ ہیں‘۔

فلسطینی صدر کا یہ بھی کہنا تھا کہ وہ جانتے ہیں کہ ایلن کے اغوا کنندگان کس گروہ سے تعلق رکھتے ہیں تاہم انہوں نے اس کی تفصیلات نہیں بتائیں۔

اس سے قبل التوحید الجہاد نامی ایک فلسطینی گروپ نے دعویٰ کیا تھا کہ اس نے بی بی سی کے غزہ سے لاپتہ ہونے والے نامہ نگار ایلن جونسٹن کو ہلاک کر دیا ہے۔

چوالیس سالہ جونسٹن کو باہر مارچ کو غزہ میں بندوق کی نوک پر اغواء کر لیا گیا تھا اور اس کے بعد سے ان کے بارے میں کوئی مصدقہ اطلاع موصول نہیں ہوئی ہے۔

ایلن کے والد نے ان کی زندہ ہونے کے بارے میں فلسطینی صدر کے بیان کو ایک اچھی خبر قرار دیا ہے۔ ان کا کہنا تھا’ یہ بہت ہی اچھی خبر ہے اور میں اسے سننے کے لیے بےتاب تھا۔ میرے خیال میں فلسطینی صدر بنا یقین کیے اس قسم کی بات نہیں کر سکتے۔ لیکن اب بھی ہمارے پاس ایلن کے زندہ ہونے کا ثبوت نہیں اور یہی وہ چیز ہے جس کا میں بے چینی سے منتظر ہوں‘۔

بی بی سی کا کہنا ہے کہ وہ ایلن جونسٹن کی خیریت کے بارے میں اس خبر کا خیرمقدم کرتے ہیں لیکن اس حوالے سے ٹھوس ثبوتوں کی ضرورت ہے۔

ایلن جونسٹن کی غزہ میں تین سالہ تعیناتی کا آغاز اپریل دو ہزار چار میں ہوا تھا اور اس دوران وہ بی بی سی ریڈیو اور ٹیلی ویژن دونوں کے لیے رپورٹنگ کرتے رہے۔گزشتہ تین سال سے غزہ جیسے پُر تشدد علاقے میں مستقل طور پر رہائش اختیار کرنے والے وہ واحد غیرملکی صحافی ہیں۔

غزہ میں اس سے پہلے بھی کئی صحافیوں کو مغوی بنایا جا چکا ہے تاہم ایلن جونسٹن سے پہلے وہاں کسی اور صحافی کو اتنے طویل عرصے تک اغواء نہیں رکھا گیا۔