عراق کے سنی علاقے سے ہتھیار برآمد کیے ہیں: امریکی ترجمان

امریکہ اس سے پہلے ایران پر الزام لگاتا رہا ہے کہ وہ عراق میں شیعہ گروہوں کو اسلحہ فراہم کرتا ہے جس سے وہ عراق میں امریکی فوج کے خلاف کارروائیاں کرتے ہیں۔

امریکی الزام پر ایرن کا فوری رد عمل سامنے نہیں آیا ہے۔

امریکی جنرل نے بغداد میں نیوز کانفرنس میں چند ہتھیار پیش کیے اور بتایا کہ یہ حال ہی میں ایران میں بنائے گئے اور پھر انہیں سرحد پار مزاحمت کاروں کے استعمال کے لیے بھیجا گیا۔

میجر جنرل ولیم کالڈویل نے کا کہنا تھا کہ ان ہتھیاروں پر جو نشانات ہیں ان کے ذریعے پتا چلا ہے کہ یہ ایران میں بنائے گئے ہیں۔ میجر جنرل کالڈویل کے مطابق ایران اب مزاحمت کاروں کو صرف ہتھیار فراہم ہی نہیں کر رہا، بلکہ انہیں استعمال کرنے کی تربیت بھی دے رہا ہے۔

میجر جنرل کالڈویل کا یہ بھی کہنا تھا کہ ایسے شواہد بھی ملے ہیں کہ ایرانی انٹیلیجنس سنی مزاحمت کارروں کو بھی امداد فراہم کر رہا ہے۔

ادھر عراقی حکومت کو امید ہے کہ اگلے ماہ مصر میں ہونے والے اجلاس میں اس کے ہمسایہ ممالک سے بڑھتی ہوئی کشیدگی کو کم کیا جا سکے گا لیکن اب ایران نے کہا ہے کہ وہ شاید اجلاس میں حصہ نہ لے۔

ایران نے ان پانچ ایرانی اہلکاروں کی رہائی کا بھی مطالبہ کیا ہے جنہیں جنوری میں امریکی فوج نے حراست میں لیا تھا۔تاہم امریکہ نے کہا ہے کہ وہ ان ایرانی شہریوں کو رہا کرنے کا کوئی ارادہ نہیں رکھتا۔