خلیج فارس میں لنگر انداز برطانوی بحری جہاز ’ایچ ایم ایس کارنیوال‘

برطانوی ٹی وی سے بات کرتے ہوئے ٹونی بلیئر کا کہنا تھا کہ’ اس وقت ہم اس معاملے کو سفارتی حلقوں کی مدد سے حل کرنے کی کوشش میں ہیں اور ایرانی حکومت کو یہ باور کروانا چاہتے ہیں کہ ان افراد کو زیرِ حراست رکھنے کی کوئی وجہ نہیں ہے‘۔

انہوں نے کہا کہ انہیں امید ہے کہ ہم انہیں یہ باور کرانے میں کامیاب ہوں گے کہ وہ ہمارے فوجی چھوڑ دیں اور اگر ایسا نہ ہوا تو حالات ایک مختلف رخ اختیار کر لیں گے۔

تاہم ٹونی بلیئر کے سرکاری ترجمان نے یہ بھی واضح کیا ہے کہ ’مختلف رخ‘ سے مراد ایران کے خلاف کوئی سخت سفارتی اقدام نہیں ہے اور نہ ہی اس سے مراد ایران کے خلاف فوجی کارروائی ہے۔

ڈاؤننگ سٹریٹ کا کہنا ہے کہ برطانیہ وہ ثبوت بھی سامنے لا سکتا ہے کہ فوجیوں کا یہ گروپ ایرانی پانیوں میں داخل نہیں ہوا تھا۔ سرکاری ترجمان کے مطابق’ہم یہ کہتے آئے ہیں کہ ہمیں یقین ہے کہ وہ فوجی عراقی پانیوں میں تھے‘۔

اس وقت ہم اس معاملے کو سفارتی حلقوں کی مدد سے حل کرنے کی کوشش میں ہیں اور ایرانی حکومت کو یہ باور کروانا چاہتے ہیں کہ ان افراد کو زیرِ حراست رکھنے کی کوئی وجہ نہیں ہے۔

ان تبصروں پر کہ ان فوجیوں کی گرفتاری کا تعلق عراق میں امریکیوں کے ہاتھوں ایرانیوں کی گرفتاری سے ہو سکتا ہے، ٹونی بلیئر کا کہنا تھا کہ اس موقع پر حالات اس وقت سے بالکل مختلف ہیں کیونکہ عراق میں ایرانی فوج کی موجودگی اقوامِ متحدہ کے مینڈیٹ کے خلاف ہے۔

برطانوی وزیراعظم نے کہا ’آخر میں سوال اس بات کا ہے کہ کیا ایرانی حکومت بین الاقوامی قانون کی پاسداری کرنا چاہتی ہے یا نہیں‘۔

اس سے قبل ایران نے کہا تھا کہ خلیج فارس سے پکڑے جانے والے اہلکاروں پر غیر قانونی طور پر ایرانی حدود میں داخل ہونے بنیاد پر مقدمہ قائم کیا جا سکتا ہے۔ایرانی حکام کی جانب سے یہ بھی کہا گیا تھا کہ چار دن قبل برطانوی بحریہ کے وہ پندرہ اہلکار، جن میں آٹھ سیلرز اور میرین فورس کے سات ارکان شامل ہیں، ہشاش بشاش ہیں۔

برطانوی فوجیوں کو اس وقت ایرانی اہلکاروں نے حراست میں لیا تھا جب وہ ایک عراقی کشتی کا معائنہ کرنے کے بعد اپنی چھوٹی کشتیوں کی جانب آ رہے تھے جن کے ذریعے انہیں واپس اپنے بحری جہاز ’ایچ ایم ایس کارنیوال‘ پر جانا تھا۔