شاہ عبداللہ کا امریکہ میں بڑی گرمجوشی سے استقبال کیا گیا

اردن کے شاہ عبداللہ نے کانگرس کے مشترکہ اجلاس سے خطاب، امریکہ کے اتحادی اور پراعتماد دوست کی حیثیت سے کیا۔ اس خطاب میں امریکہ کے لیے تعریف اور ستائشی کلمات کے علاوہ واضح اشارے بھی تھے اور اسرائیل فلسطین تنازعہ سے لا تعلقی پر تنقید بھی۔

شاہ عبداللہ نے کہا کہ مشرق وسطی کی موجودہ صورت حال تشویشناک اور ناقابلِ برداشت ہے اور یہ نہ صرف مشرق وسطی بلکہ پوری دنیا کے لیے بھی انتہائی خطرناک ہے۔

شاہ عبداللہ نے خبردار کیا کہ تشدد کا نہ ختم ہونا والا سلسلہ بڑی تیزی سے بڑھتا جا رہا ہے جو پوری دنیا کو اپنی لپیٹ میں لے سکتا ہے۔

کانگرس کے مشترکہ اجلاس سے خطاب  ساٹھ برس سے فلسطینیوں کی دربدری اور چالیس سال سے جاری اسرائیل کے قبضے نے مایوسی اور ناامیدی کی تلخ اور طویل داستان مرتب کی ہے۔ اردن کے شاہ عبداللہ

اردن کے شاہ نے کہا کہ عراق سے زیادہ ضروری ہے کہ مسئلہ فلسطین کو حل کیا جائے۔

انہوں نے کہا کہ ساٹھ برس سے فلسطینیوں کی دربدری اور چالیس سال سے جاری اسرائیل کے قبضے نے مایوسی اور ناامیدی کی تلخ اور طویل داستان مرتب کی ہے۔

انہوں نے کہا کہ امریکہ کی طرح ہمارے خطے میں بھی عراق کے بارے میں تشویش پائی جاتی ہے۔ پوری عالمی برادری کو عراق کی سلامتی، یکجہتی اور مستقبل کے بارے میں اہم فیصلے کرنے ہیں۔ لیکن ہم حقیقیت سے منہ نہیں موڑ سکتے کہ خطے میں تضاد، مایوسی اور بے چینی کی اصل وجہ فلسطین میں انصاف کا نہ کیا جانا ہے۔

انہوں نے کہا اس سے زیادہ کیا چیز امریکہ کی اخلاقی برتری دنیا پر ثابت کر سکتی ہے کہ یہ اپنی قائدانہ صلاحیت سے امن کے عمل کو آگے بڑھاتے ہوئے آئندہ پانچ سال میں نہیں، آئندہ سال نہیں بلکے اسی سال اس مسئلہ کو حل کر سکتا ہے۔

بی بی سی کے نامہ نگار جین لٹل کے مطابق شاہ عبداللہ نے کہا کہ امریکہ کو اپنی اخلاقی ساکھ اور دہشت گردی کے خلاف جنگ کو مربوط کرکے اسرائیل فلسطین تنازعہ کو حل کرنا چاہیے اور ایک مختلف روایت قائم کرنی چاہیے۔

انہوں نے سنہ دو ہزار دو میں سعودی عرب کی طرف سے پیش کردہ امن فارمولے کی حمایت کی۔ اس فارمولے میں فلسطینی ریاست کے قیام کے عوض پوری عرب دنیا کی طرف سے اسرائیل کو تسلیم کرنے کی بات کی گئی تھی۔

انہوں نے کہا کہ پوری عالمی برادری کو مل کر اس مسئلہ کو حل کرنا ہوگا اور خاص طور پر امریکہ کو اس میں شامل ہو کر اس سلسلے کو آگے بڑھانا ہو گا۔

شاہ عبداللہ پہلی مرتبہ کانگرس کے مشترکہ اجلاس سے خطاب کر رہے تھے۔ اس سے قبل ان کے والد انیس سو چورانے میں کانگرس کے مشترکہ اجلاس سے خطاب کر چکے ہیں۔ اس وقت اوسلو امن معاہدے کے بعد عرب اسرائیل تنازعے کے حل ہوجانے کی بڑی امیدیں تھیں۔

انہوں نے کہا کہ انیس سو چورانے میں ان کے والد نے اسرائیل کے وزیر اعظم اسحق رابن کی موجودگی میں ایک نئے مشرق وسطی کی بات کی تھی اور امن کے لیے ان کے جرتمندانہ کام کی امریکہ میں دونوں جماعتوں سے تعلق رکھنے والے ارکان نے حمایت کی تھی۔

انہوں نے کہا ’تیرہ سال گزر جانے کے باوجود وہ کام اب بھی ادھورا ہے اور جب تک یہ ادھورا رہے گا ہم سب کو خطرہ ہے۔‘