’طالبان کے عراقی مجاہدین سے بہت گہرے تعلقات ہیں‘

عرب ٹی وی الجزیرہ کو ایک انٹرویو میں افغانستان میں طالبان کی عسکری کارروائیوں کے سربراہ ملا داد اللہ نے کہا کہ’ آج کے طالبان پانچ برس پہلے والے طالبان جیسے نہیں رہے‘۔

انہوں نے اپنے انٹرویو میں امریکہ کی مدد کرنے پر پاکستان اور عرب ممالک پر کڑی تنقید کی اور کہا کہ پاکستان کی وجہ سے ان کی تحریک کو جتنا نقصان پہنچا ہے اتنا امریکہ یا برطانیہ کی وجہ سے بھی نہیں پہنچا۔

ملا داداللہ کا یہ بھی کہنا تھا کہ طالبان اس موسمِ بہار میں افغانستان میں اپنی کارروائیاں تیز کر دیں گے اور ابتدائی طور پر ان کارروائیوں میں چھ ہزار طالبان شریک ہوں گے اور یہ تعداد بیس ہزار تک بڑھا دی جائے گی۔

طالبان رہنما نے انٹرویو کے دوران یہ دعوٰی بھی کیا کہ طالبان جنگجو عراق میں امریکہ مخالف مزاحمت کاروں کی مدد کر رہے ہیں۔ انہوں نے کہا’ہمارے عراقی مجاہدین سے بہت گہرے تعلقات ہیں۔جب بھی موقع میسر آتا ہے تو مجاہدین عراق اور افغانستان کے درمیان آتے جاتے رہتے ہیں اور ہم لوگ خفیہ معلومات کا تبادلہ بھی کرتے ہیں‘۔

ملا داد اللہ کا یہ انٹرویو اس وقت سامنے آیا ہے جب امریکی نائب صدر ڈک چینی کے دورۂ پاکستان کے فوراً بعد کوئٹہ سے طالبان دور کے افغان وزیرِ دفاع عبیداللہ اخوند کی گرفتاری کی خبریں گردش میں ہیں۔ پاکستانی حکام کی جانب سے تاحال گرفتاری کی تصدیق نہ کیے جانے کی وجہ سے صورتحال میں ابہام پایا جاتا ہے۔