ڈک چینی نے پاکستان حکومت سے دہشت گردی ختم کرنے کے لیے مزید تعاون کے لیے کہا

اسلام آباد میں بی بی سی کی نامہ نگار بابرا پلیٹ کہتی ہیں کہ اِس بڑھتے امریکی دباؤ پر پاکستان کے صبر کا پیمانہ لبریز نظر آ رہا ہے۔

امریکی نائب صدر ڈک چینی کے دورے کے بعد صدر جنرل پرویز مشرف کے دفتر سے ایک خاصہ تلخ بیان جاری کیا گیا جس کی جھنجلاہٹ کی گونج پاکستان کے اخباروں میں بھی محسوس کی گئی۔

مبصرین اس بات پر تو اتفاق کرتے ہیں کہ افغانستان میں بڑھتی مزاحمت کے لیے پاکستان کو کسی حد تک مورد الزام ٹھہرایا جاسکتا ہے اور یہ کہ پاکستان کے سرحدی علاقوں میں طالبان اور القاعدہ کے دوبارہ منظم ہونے پر امریکہ کی تشویش بھی درست ہے لیکن کئی مبصرین صدر جنرل پرویز مشرف کے اِس دعوے سے بھی اتفاق کرتے ہیں کہ سرحدوں کی نگرا نی کے لیے ان سے جتنا ہوسکتا تھا انہوں نے کیا ہے اور یہ کہ افغانستان میں عسکریت پسندوں سے جنگ کے لیے بین الاقوامی برادری اجتماعی طور پر ذمہ دار ہے۔

	ڈک چینی پاکستان کے اچانک دورے کے فوراً بعد افغانستان چلے گئے

مبصرین کا کہنا ہے کہ نیٹو افواج افغانستان کی تعمیر نو میں ناکام رہی ہیں اور افعان حکومت ملک کا کنٹرول سنبھالنے میں ناکام ہے۔ کئی ایسے جنگجو سردار جنہوں نے ایک لمبے عرصے سے جاری خانہ جنگی میں طاقت کا غلط استعمال کیا تھا اب وہ مغرب کے اتحادی ہیں۔

ذرائع ابلاغ میں یہ بھی آیا ہے کہ افغانستان میں نیٹوں فوجی کی کارروائیوں میں عام شہریوں کی ہلاکت کی وجہ سے مقامی طور پر طالبان کی حمایت میں اضافہ ہو رہا ہے۔ خاص طور پر پاکستان میں یہ اندیشہ پایا جاتا ہے کہ قبائلی علاقوں میں عسکریت پسندوں کے خلاف مزید کوششیں کرنے کے امریکی حکم کا مطلب علاقے میں مبینہ ٹریننگ کیمپوں پر فضائی حملے کرنا ہے۔

پاکستان میں یہ خیال کیا جاتا ہے کہ ماضی میں اِس طرح کے حملوں کا نتیجہ پاکستان میں خود کش بم حملوں کے ایک سلسلہ کی شکل میں سامنے آیا تھا اور اس کے علاوہ طالبان نواز گروہوں کی بھرتی میں اضافہ بھی ہوا تھا۔ اور یہ کہ مزید حملوں کا بھی یہی نتیجہ نکلے گا۔