’چوبیس گھنٹوں میں پانچ امریکی فوجی ہلاک ہوئے ہیں‘

اس سے قبل امریکی فوج نے اپنے ایک بیان میں کہا تھا کہ گزشتہ چوبیس گھنٹوں کے دوران مختلف واقعات میں ان کے پانچ فوجی ہلاک ہوچکے ہیں۔

عراقی اور امریکی فوج کی نئی سکیورٹی مہم کے باوجود بغداد پرتشدد واقعات کی لپیٹ میں ہے۔

ایک دھماکہ بغداد کے سعدیہ ضلعے میں ایک پٹرول سٹیشن کے نزدیک ہوا جبکہ دوسرا دھماکہ بغداد ہی کی ایک سبزی کی مارکیٹ میں کیا گیا۔

دو امریکی فوجی اس وقت ہلاک ہوگئے جب بغداد کے جنوب میں ترمیہ کی فوجی چوکی پر حملہ کیا گیا تھا۔

ایک روز قبل بھی بغداد اور گردو نواح میں مختلف بم دھماکے ہوئے جن میں دو امریکی فوجیوں سمیت بیس سے زائد افراد ہلاک اور درجنوں زخمی ہوگئے تھے۔

تشدد کے یہ واقعات ایسے وقت پر ہور ہے ہیں جب بغداد سمیت عراق کے مختلف علاقوں میں سکیورٹی مستحکم کرنے کے لیے امریکی فوج اور عراقی پولیس مشترکہ طور پر کئی خصوصی آپریشن کر رہی ہیں۔

پیر کو گیارہ افراد مغربی صوبہ انبار کے رمادی علاقے میں ہلاک ہوگئے جس میں پانچ پولیس اہلکار بھی شامل تھے۔ اسی روز دوسرا دھماکہ بغداد کی ایک بس میں ہوا تھا جس میں پانچ افراد ہلاک اور آٹھ زخمی ہوگئے تھے۔