یہ واضح نہیں کہ ہیلی کاپٹر علاقے میں کسی مشن پر تھا یا نہیں

تباہ ہونے والا ہیلی کاپٹر امریکی شنوک تھا اور صوبہ زابل کےشاہجوائے نامی ضلع میں تکنیکی خرابی کے باعث گر کر تباہ ہوا۔

زابل کی سرحد پاکستان سے بھی ملتی ہے اور یہاں حال ہی میں طالبان کی سرگرمیاں دیکھنے میں آئی ہیں۔ تاہم یہ واضح نہیں کہ ہیلی کاپٹر علاقے میں کسی مشن پر تھا یا نہیں۔

ہیلی کاپٹر کی تباہی کی وجہ انجن میں خرابی بتائی گئی ہے۔ خبر رساں ادارے ایسوسی ایٹڈ پریس کے مطابق ایساف کے کرنل ٹام کولنز کا کہنا ہے کہ یہ واقعہ دشمن کی کارروائی کا نتیجہ نہیں تھا۔

انہوں نے کہا ’پائلٹ نے یہ اطلاع دی تھی کہ ہیلی کاپٹر کے انجن میں خرابی پیدا ہوگئی ہے اور ہمیں یقین ہے کہ اس خرابی کی وجہ دشمن کی کارروائی نہیں تھی‘۔

طالبان کے ترجمان نے کہا ہے کہ ہیلی کاپٹر ان کے حملے کا نشانہ بنا تاہم کابل میں بی بی سی کے نمائندے الیسٹر لیتھ ہیڈ کے مطابق طالبان کی جانب سے اس قسم کے دعوے ماضی میں بھی کیے جاتے رہے ہیں۔ بی بی سی کے نمائندے کے مطابق تباہ ہونے والے ہیلی کپٹر کا تعلق بگرام ائر بیس سے تھا۔

گزشتہ چند سالوں میں افغانستان میں اتحادی اور نیٹو افواج کے متعدد ہیلی کاپٹر تباہ ہوئے ہیں تاہم ان میں سے صرف ایک کے بارے میں یہ تصدیق ہوئی تھی کہ اسے دشمن نے مار گرایا تھا۔