باقی مسافروں کے بارے میں کہا جا رہا ہے کہ انہیں ان کے متعلقہ ممالک روانہ کیا جائے گا

سپین میں اقوام متحدہ کے پناہ گزینوں کے ادارے UNHCR کے ترجمان کا کہنا ہے کہ ان پینتیس افراد کو ہسپانوی حکام نے سیاسی پناہ حاصل کرنے کا اہل قرار دیا ہے۔

ترجمان کے مطابق ان افراد میں سے تین کا تعلق افغانستان، دس کا سری لنکا اور بائیس کا برما سے ہے۔

تارکینِ وطن کا یہ معاملہ قریباً دو ہفتے قبل اس وقت سامنے آیا تھا جب میرین 1 نامی کشتی بھارت کے زیر انتظام کشمیر، برما، سری لنکا اور افغانستان سے تعلق رکھنے والے 334 تارکینِ وطن کو کنیری کے جزائر کی طرف لے جاتے ہوئے راستے میں خراب ہو گئی تھی۔

خرابی کا شکار میرین 1 کو ہسپانوی بحریہ کے ایک جہاز نے کھینچ کر موریطانیہ کی شمالی بندرگاہ نووادیبو پہنچایا تھا۔

کشتی کے باقی مسافروں کے بارے میں UNHCR کے ترجمان کا کہنا تھا کہ انہیں ان کے متعلقہ ممالک کی طرف روانہ کیا جائے گا۔

سینیگال اور موریطانیہ یورپی ممالک میں داخل ہونے کے لیے مشہور ہیں۔ ان ممالک سے غیر ملکی تارکینِ وطن جزائر کینری پہنچتے ہیں، جہاں سے انہیں یورپ میں داخل ہونے میں آسانی ہوتی ہے۔